Byari ibicika kuri iki Cyumweru mu nyubako y’imikino n’imyidagaduro izwi nka BK-Arena, mu mikino ya nyuma y’irushanwa ryo Kwibohora ryakinwaga ku nshuro yaryo ya mbere.
Iri rushanwa ryateguwe n’Ishyirahamwe rya Volleyball mu Rwanda (FRVB) rigamije gushimira abahoza ari Ingabo z’Inkontanyi zahagaritse Jenoside yakorwaga Abatutsi zikanabohora Igihugu, ryaraye ryegukanywe n’ikipe ya Polisi y’u Rwanda (Police WVB) mu kiciro cy’abagore n’ikipe y’Ingabo z’u Rwanda (APR VB) mu kiciro cy’abagabo.
APR VB yageze ku mukino wa nyuma ikuyemo Police VB ku ntsinzi y’amaseti 3-1, mu gihe ari nako byagenze kuri Gisagara VB imbere ya REG VB.
Mu kiciro cy’abagore, Police WVB yakataishije itike y’umukino wa nyuma isezereye Ruhango WVB ku ntsinzi y’amaseti 3-1, mu gihe APE WVB yakuyemo RRA bigoranye ku ntsinzi y’amaseti 3-2.
Mu kiciro cy’abagabo, APR VB yegukanye igikombe nyuma yo guhigika Gisagara VB ku maseti 3-1 (25-23, 25-22, 23-25, 27-25).
Muri uyu mukino, APR VB yafashijwe bikomeye n’abakinnyi barimo Gisubizo Merci, Gatsinzi Venuste n’Umupaseri (Setter) wanyuze abatari bacye bari muri BK-Arena, Umunyakenya Merry Brian.
Uku kwitwara neza kw’aba bakinnyi, kwafashije APR VB gutsinda mu buryo bwihuse amaseti abiri ya mbere ikipe ya Gisagara VB idakozemo.
Gusa, uko umukino waganaga ku musozo, niko urugamba rwerekezaga aho rukomeye.
Mu iseti ya gatatu, abasore b’Umutoza Yakan Guma Lawrence wa Gisagara, bayikinnye nk’abariye amavubi, bayegukana ku manota 25 kuri 23.
Iseti ya kane yafatwaga nk’ishiraniro kuri buri ruhande, yarangiye nta nkuru kuko imitima yari yavuye mu bitereko haba ku ruhande rwa APR VB yari ifite amaseti abiri ndetse na Gisagara VB yari ifite imwe, kuko yarangiye APR VB itegukanye ku ntsinzi y’amanota 27 kuri 25, ihita inegukana irushanwa ityo.
Uretse APR VB, mu kiciro cy’abagore, Police WVB yegukanye iri rushanwa nyuma yo guhigika APR WVB ku ntsinzi y’amaseti 3-1.
Police WVB yatangiye neza umukino ibikesha Umugandekazi Catherine Ainembabazi, yanyabitse APR WVB amaseti abiri ya mbere mu buryo bwihuse, ku manota 25-14 na 25 kuri 18.
Nyuma yo gutsindwa amaseti abiri, umutoza Siborurema Florient wa APR WVB n’abakinnyi be biminjiriyemo agafu mu iseti ya gatatu, bayegukana ku ntsinzi y’amanota 25 kuri 20.
Iseti ya kane ntago yigeze iborohera nyuma yo kwegukana iya gatatu kuko abakinnyi b’Umutoza Hatumimana Christian bayikinnye nk’abariye amavubi, bayegukana ku ntsinzi y’amanota 25 kuri 14, bahita banegukana iri rushanwa ryakinwaga ku nshuro ya mbere.
Ibihembo:
(1,000,000 Frw)
(700,000 Frw)
(500,000 Frw)(1,000,000 Frw)(700,000 Frw) (500,000 Frw)Amafoto (Shema Innocent)
