Kuri iki Cyumweru tariki ya 28 Nyakanga 2024, harasozwa Irushanwa ryo kwizihiza Imyaka 30 ishize u Rwanda rwibohoye.
Iri rushanwa riri gukinwa ku nshuro yaryo ya kabiri, ryitabiriwe n’amakipe yabaye ane ya mbere muri Shampiyona mu kiciro cy’abagabo n’abagore.
Mu kiciro cy’abagabo, ryitabiriwe na; APR VC, Kepler VC, REG VC na Police VC. Mu gihe mu cy’abagore ryitabiriwe na; APR WVC, Police WVC, RRA VC na Ruhango VC.
Tariki ya 26 Nyakanga 2024, n’ukuvuga ejo hashize, hakinwe imikino yo gushaka itike yo kujya ku mukino wa nyuma, iyi ikaba yarahuje APR WVC na Ruhango VC mu bagore, mu gihe APR VC yisobanuye na Police VC.
Muri iyi mikino, mu kiciro cy’abagore, APR WVC yatsinze Ruhango VC amaseti 3-0, mu gihe Police yisengereye APR VC amaseti 3-1. Nyuma yo gutsinda iyi mikino, zahise zikatisha itike y’umukino wa nyuma.
Kuri uyu wa Gatandatu, hakomeje imikino yagombaga kwerekana amakipe asanga aya yari yageze ku mukino wa nyuma.
Mu kicico cy’abagore, Police WVC yasoreje ku mwanya wa kabiri muri Shampiyona, yisobanuraga na RRA VC yasoje ari iya gatatu, umukino urangira Police WVC igeze kuri Finale nyuma yo guhigika RRA VC ku ntsinzi y’amaseti 3-1. (25-21, 19-25, 25-20,25-17).
Uyu mukino wakurikiwe n’uwahuje Kepler VC yabaye iya kabiri, na REG VC yasoreje ku mwanya wa gatatu.
Ikipe ya Kaminuza ya Kepler, Kepler VC, itigeze igorwa n’uyu mukino, yawutsinze ku ntsinzi y’amaseti 3-0 (25-15, 25-13-25-19).
Imikino ya nyuma itegerejwe kuri iki Cyumweru tariki ya 28 Nyakanga 2024, ikazabimburirwa n’imikino yo guhatanira umwanya wa gatatu izatangira guhera ku Isaha ya saa 13:30.
- Umwanya wa gatatu abagore: RRA VC vs Ruhango VC
- Umwanya wa gatatu abagabo: APR VC vs REG VC
- Umukino wa nyuma abagore: APR WVC vs Police WVC
- Umukino wa nyuma abagabo: Police VC vs Kepler VC.
Iyi mikino iri gukinirwa muri Petit Stade Amahoro ivuguruye, kwinjira n’amafaranga 5000 Frw, ukareba imikino yose y’Umunsi.
Umwaka ushize ubwo iri rushanwa ryakinwa ku nshuro yaryo ya mbere, ryegukanywe n’Ikipe ya APR VC mu bagabo na Police WVC mu bagore.
Iri rushanwa ritegurwa n’Ishyirahamwe ry’Umukino wa Volleyball mu Rwanda, FRVB, mu rwego rwo kwishimira aho Igihugu kigeze, nyuma yo kubohorwa n’Ingabo zahoze ari iza RPA/FPR-Inkotanyi mu 1994, zikanahagarika Jenoside yakorerwaga Abatutsi.