Ikipe y’Ingabo ya Volleyball y’Ingabo z’u Rwanda, APR WVC, yatangiye neza imikino ya shampiyona ny’Afurika ihuza amakipe yegukanye ibikombe iwayo.
Iyi kipe iri i Abuja muri Nijeriya ahari kubera iyi mikino ihuza amakipe yo mu kiciro cy’abagore, yisengerereye CF Carthage yo muri Tuniziya mu mukino wafunguye iri rushanwa.
Mu mukino wamaze amasaha abiri arengaho gato, APR WVC yastinze CF Carthage amaseti 3-1 (18-25, 26-24, 25-23, 25-23).
N’ubwo yegukanye iyi ntsinzi ariko ntabwo yatangiye umukino yorohewe, kuko CF Carthage yayitsinze iseti ya mbere iyirusha amanota 7 (25-18).
Nyuma yo gutsindwa iseti ya mbere, umutoza wa APR WVC, Kamasa Peter, yabonye ko Diane Mpuhwezimana, umugabuzi w’imipira [Setter] usanzwe ari nimero ya mbere yatangiranye igihunga cyane ko ari ku nshuro ya mbere akinnye imikino iri kuri uru rwego, amusimbuza Akimanizanye Ernestine, uri mu bakinnyi iyi kipe ifite ufite ubunararibonye, by’umwihariko yakuye mu ikipe ya RRA VC mbere yo kwerekeza muri APR WVC.
Kujya mu kibuga kwa Akimanizanye Ernestine byafashije APR WVC kwigaranzura CF Carthage, yegukana iseti ya kabiri itari yoroshye na gato, kuko yasabye ko amakipe agera ku manota ari hejuru ya 25 iseti isanzwe irangiriraho. Yarangiye APR WVC ifite amanota 26 kuri 24 ya CF Carthage.
APR WVC yakomereje muri uyu mujyo w’intsinzi, inegukana n’iseti ya gatatu, ku manota 25 kuri 23.
Kamasa wageragezaga gukinisha abagabuzi be bose, yagaruye mu kibuga Mpuhwezimana Diane, nawe akomereza aho Akimanizanye yari ageze, APR WVC yegukanye n’iseti ya kane nabwo ku manota 25 kuri 23.
Kwegukana uyu mukino ku ruhande rwa APR WVC ntabwo bivuze intsinzi gusa, kuko byari binasobanuye ko ari ku nshuro ya mbere ikipe yo mu Rwanda intsinzi iyo mu bihugu by’Abarabu bo ku mugabane w’Afurika muri Volleyball yo mu kiciro cy’abagore.
Binasobanuye kandi ko APR WVC atari agafu k’imvugwarimwe muri iyi mikino, bityo ko amakipe akwiye kuyihanga amaso.
Uretse CF Carthage, APR WVC isangiye itsinda rya mbere n’andi makipe arimo Customs yo muri Nijeriya na Mayo yo muri Kameroni.
Indi kipe yo mu Rwanda yitabiriye iyi mikino, n’ikipe ya Polisi y’Igihugu, Police WVC. Iyi, izaseruka mu kibuga kuri uyu wa Gatanu ku isaha ya saa 19:00 za Kigali.
Amafoto
