Uretse Joe Biden wahise atangaza ko ashyigikiye ko Visi-Perezida Kamala Harris ari we uba nimero ya mbere kuri tike yo kwiyamamaza y’Abademokarate, abandi b’ibikomerezwa bo mw’ishyaka ryabo nabo batangaje ko bari inyuma ya Harris.
Aba mbere babyihutiye ni abagize icyo bita Congressional Black Caucus. Ni itsinda ry’Abirabura bose bari mu nteko ishinga amategeko yo ku rwego rw’igihugu-Congress. Ababikurikiranira hafi bemeza ko ifite ijambo ryumvikana kandi rigera kure.
Abakomeye ku giti cyabo, kw’isonga hari Bill Clinton, wabaye perezida wa 42 wa Leta zunze ubumwe z’Amerika, kuva mu 1993 kugera mu 2001, n’umutegarugoli we Hillary Clinton, wabaye kandida w’ishyaka ry’Abademokatate mu matora y’umukuru w’igihugu yo mu 2016, ariko aza gutsindwa na Donald Trump.
Bavuga ko bazakora ibishoboka byose kugirango Kamala Harris atsinde mu kwa 11 gutaha. Bati: “Ejo hazaza ha Amerika ni ho hashingiye.”
Abandi batangaje ko bari inyuma ya Kamala Harris ku giti cyabo barimo abasenateri n’abadepite batandukanye bo mw’ishyaka ry’Abademokarate. Kandi baragenda biyongera.
Kuba aba bose bavuga rumwe na Biden, biraha imbaraga nyinshi Visi-Perezida Harris, n’ubundi wari nimero ya kabiri kuri tike y’Abademokarate. Ishyaka riramutse rimuhisemo ngo abe nimero ya mbere, byaba ari amateka.
Harris yaba abaye Umwiraburakazi n’ufite inkomoko muri Aziya wa mbere na mbere ubaye kandida wa rimwe mu mashyaka akomeye mu myaka 248 Leta zunze ubumwe z’Amerika imaze ivutse.
Ise (Papa) wa Harris ni Umwirabura ukomoka muri Jamaica, naho mama we akomoka mu gihugu cy’Ubuhinde.
Mw’itangazo yashyize ahagaragara, Kamala Harris yanditse ko “atewe icyubahiro n’uko Perezida Biden amuri inyuma.”
Yongeraho ko “afite ubushake bwo gukora ku buryo ishyaka naryo rimwemeza nka kandida waryo.”
Inama kaminuza y’Abademokarate izemeza kandida-perezida na kandada- visi perezida izaba kuva kw’itariki ya 19 kugera ku ya 22 mu kwa munani gutaha i Chicago, umujyi wa mbere utuwe kurusha iyindi muri Leta ya Illinois. (VoA)