Kompanyi y’indege ya Kenya, Kenya Airways (KQ), ivuga ko yahagaritse ingendo zerekeza mu murwa mukuru Kinshasa wa Repubulika ya Demokarasi ya Congo kubera gufungwa “kunyuranyije n’amategeko” kw’abakozi bayo babiri ivuga ko bafunzwe n’ubutasi bwa gisirikare bw’icyo gihugu.
Mu itangazo yasohoye ku wa mbere ku rubuga nkoranyambaga X, KQ ivuga ko idashoboye “gukora izi ngendo neza nta bakozi”.
Iyo kompanyi yavuze ko uko guhagarika ingendo gutangira kuri uyu wa kabiri.
Position Statement: Kenya Airways Suspends Flights to Kinshasa https://t.co/a3tEyBnO9n pic.twitter.com/4gstsoVcz0
— Kenya Airways (@KenyaAirways) April 29, 2024
Ku itariki ya 19 y’uku kwezi kwa Mata (4), abakozi babiri ba KQ bafunzwe n’urwego rw’ubutasi bwa gisirikare rwa DR Congo, ruzwi nka DEMIAP (Détection Militaire des Activités Anti-Patrie), kubera ikivugwa ko ari “ibura ry’ibyangombwa byo kuri gasutamo ku muzigo w’agaciro kenshi”, nkuko iyo kompanyi yabitangaje.
Ariko umuyobozi nshingwabikorwa wa KQ yavuze ko “uwo muzigo uvugwa ntiwapakiwe cyangwa ngo wemerwe na KQ kubera ibyangombwa bituzuye”.
Muri uko gutabwa muri yombi, telefone z’abo bakozi babiri zarafatiriwe ndetse bangirwa ko hari uwabageraho kugeza ku itariki ya 23 Mata, ubwo noneho abategetsi bo muri ambasade ya Kenya i Kinshasa hamwe n’itsinda rya KQ bemererwaga kubasura.
Iyi kompanyi yo gutwara abagenzi mu ndege yashishikarije igisirikare cya DR Congo kurekura abo bakozi ba KQ bagasubira mu miryango yabo.
Leta ya DR-Congo nta cyo yari yatangaza kuri ibi. (BBC)