Mu gihe Intambara Uburusiya bwagabye muri Ukraine igeze mu mahina, Ubufaransa bugiye kwifatanya n’Ubwongereza guha iki gihugu Misile zirasa kure. Izi zishobora gukora urugendo rwa Kilometero 250 mu Kirere.
Abayobozi b’Ubufaransa bavuze ko ibyo bizafasha ingabo za Ukraine guhangana n’iz’Uburusiya. Perezida w’Ubufaransa, Emmanuel Macron, yavuze ko yafashe icyemezo cyo kwongera imfashanyo ya gisirikare ku gihugu cya Ukraine, kugirango kibashe kwirwanaho.
Yabivuze ubwo yari ageze muri Lituwaniya mu nama y’abakuru b’ibihugu 31 bigize umuryango wa OTAN. Cyakora yirinze kuvuga umubare wa misile zizoherezwa.
Umudipolomate w’Ubufaransa yavuze ko havugwa misile zigera muri 50 zizwi nka SCALP zakozwe n’isosiyete yo mu burayi, MBDA. Izo misile zizava muzo Ubufaransa busanganywe mu bubiko bwa gisirikare, nk’uko bivugwa n’igisirikare cy’Ubufaransa yageze ku banyamakuru.
Ukraine yari imaze amezi isaba misile zirasa kure. Ariko Leta zunze ubumwe z’Amerika, igihugu kiyiha ibyinshi mu bikoresho, cyari kitaremera kuyiha izo misile.
Ubwo bwoko bwa misile z’Ubufaransa buzwi nka SCALP, burasa mu bilometero 250, bikubye incuro eshatu, ubushobozi bwa misile Ukraine ifite ubu.
Macron yavuze ko izo misile zizatangwa hakurikijwe ingamba z’Ubufaransa mu bijyanye no gufasha Ukraine kurengera ubutaka bwayo. Yumvikanishaga ko Paris yahawe icyizere na Kiev ko nta misile zizaraswa imbere mu Burusiya. (Reuters)
