Abanyamuryango ba Rayon Sports batoye Bwana Twagirayezu Thadée nk’umuyobozi w’iyi kipe ikundwa n’abatari bacye mu Rwanda, asimbuye Jean Fidéle Uwayezu.
Yatorewe Manda y’Imyaka ine (4) izarangira mu 2028 ntagihindutse. Umu mugabo wo mu Karere ka Kirehe mu Ntara y’i Burasirazuba, yatowe ku majwi 100%.
Muri aya matora yakorewe mu nteko rusange yabereye mu Nzove kuri uyu wa Gatandatu, yatorewemo indi myanya itandukanye, irimo uwa Paul Muvunyi, wagizwe umuyobozi w’urwego rw’ikirenga.
Twagirayezu azungirizwa na Prosper Muhirwa nka Visi Perezida wa mbere ndetse na Roger Aimable Ngoga nka Visi Perezida wa kabiri.
Roger Aimable Ngoga yari muri Rayon Sports nk’umuyobozi w’inzibacyuho, nyuma yo kwegura kwa Jean Fidéle Uwayezu, weguye mu ntangiriro z’Ukwezi kwa Nzeri (9).
Patrick RUKUNDO yatorewe kuba umubitsi muri komite y’umuryango wa Rayon Sports.
Undi wahawe umwanya wari witezwe n’abafana, ni Chance Denys GACINYA, watorewe kuba umujyana muri komite y’umuryango wa Rayon Sports.
Chance Denys GACINYA yayoboye Rayon Sports hagati y’Umwaka w’i 2014 na 2017.
Ku bijyanye n’urwego rw’ikirenga ruzayoborwa na Muvunyi Paul, izafashwa na Paul RUHAMYAMBUGA, Charles NGARAMBE, Theogene NTAMPAKA, Sadate MUNYAKAZI, Jean Fidele UWAYEZU na Valens MUNYABAGISHA nk’abajyanama.
Muvunyi Paul yaherukaga muri iyi kipe mu 2019, ndetse icyo gihe yanayifashije kwegukana igikombe cya Shampiyona yakuye mu Karere ka Kirere.
Iki ni nacyo iheruka kuko kuva icyo gihe, undi musaruro mwiza yagize n’ukwegukana igikombe cy’Amahoro mu 2023 itsinze APR FC ku mukino wa nyuma wakiniwe mu Karere ka Huye mu Ntara y’Amajyepfo y’u Rwanda.
Abakunzi ba Rayon Sports kandi bibuka Muvunyi nk’uwari umuyobozi w’iyi kipe ubwo yageraga mu mikino y’amatsinda ya CAF Confederation Cup.
Kugera muri iyi mikino (1/4), n’umuhigo Rayon Sports FC yisangije nk’ikipe rukumbi yo kubutaka bw’u Rwanda.
Nk’umuyobozi w’urwego rw’ikirenga, azakorana Dr. Emile RWAGACONDO, mu gihe Abdallah MURENZI yatorewe kuba umunyamabanga.
Abdallah MURENZI yayoboye Rayon Sports hagati y’Umwaka w’i 2012 n’i 2014.
Yaba urwego rw’ikirenga ruyobowe na Muvunyi na Komite ya Rayon Sports, intego n’imwe, ariyo yo kugarurira abakunzi b’iyi kipe ibyishimo binyuze ku gutwara ibikombe n’intsinzi rugeretse nk’uko byahoze.
Ibi kandi birerekana amarenga yo kugerwaho, kuko Rayon Sports iri ku mwanya wa mbere wa shampiyona by’agateganyo n’amanota 20 nyuma y’imikino y’umunsi wa munani.
Amafoto
