Umuryango uharanira uburenganzira bwa muntu, Human Rights Watch, HRW, kuri uyu wa kabiri watangaje ko igisirikare cya Cade cyagize uruhare mu iyicwa ry’imfungwa zafatiwe mu myigaragambyo yo mu 2022.
Raporo y’umuryango Human Rights Watch ivuga ko abantu bane baguye mu nzira bajyanywe muri gereza y’ahitwa Koro, abandi batandatu bakagwa muri iyo gereza.
Iyi raporo ivuga ko aho undi muntu umwe yaguye hatamenyekanye neza, ikongeraho ko umubare w’abapfuye ushobora kuba urenze kuri uwo.
Icyo gihe, inzego z’umutekano za Cade zasutse urusasu ku bantu bari mu myigaragambyo hapfa abantu 60. Iyo myigragambyo yari iyo kwamagana ko ubutegetsi bwa perezida Mahamat Deby Itno bwongererwa ikindi gihe cy’imyaka ibiri.
Imvururu nk’izo zari zitarabaho muri Cade kugeza igihe Prezida Idris Deby umubyara yiciwe nyuma y’imyaka irenga 30 yari amaze ku butegetsi.
Icyo gihe ababarirwa mu magana batawe muri yombi bafungirwa muri gereza ya Koro iri mu birometero 600 uvuye mu murwa mukuru N’djamena
Umuryango Human Rights Watch wasabye inzego z’ubutegetsi za Cade, Umuryango w’Afurika yunze Ubumwe n’Umuryango w’Abibumbye gukora iperereza ku cyo wise ifungwa ridakurikije amategeko, gufatwa nabi muri gereza n’impfu z’imfungwa. (VoA)
