Ikipe ya Dream Fighters muri Poomsae n’iya Dream Taekwondo Club muri Kyorugi, zegukanye Shampiyona y’Igihugu mu mukino wa Taekwondo.
Hagati ya tariki 27 na 28 Mata 2024, Ishyirahamwe ry’Umukino Njyarugamba wa Taekwondo, ryateguye Shampiyona y’igihugu mu kiciro cy’Abana, Ingimbi n’Abangavu ndetse n’ikiciro cy’abakinnyi bakuru.
Iyi Shampiyona yakiniwe mu Nzu y’Imikino ya Hilltop Hotel i Remera mu Mujyi wa Kigali, yakinwe mu buryo bwa Poomsae kwiyereka ndetse na Kyorugi cyangwa se kurwana.
Abakinnyi basaga 300 bavuye mu makipe 25 mu gihugu hose, barimo Abana, Ingimbi n’Abangavu barushanyijwe mu kiciro cya Kyorugi no muri Poomsae.
Bitandukanye na Kyorugi, Poomsae yakinwe n’Abana, Ingimbi n’Abangavu ndetse n’Abakuze.
Come one come all!!!
The best of at #poomsae in #taekwondo are there for you with incredible performance.Venue: @hilltophotel_rw pic.twitter.com/ZcME7T9Uou
— Rwanda Taekwondo Federation (@TaekwondoRwanda) April 24, 2024
Nyuma yo guhatana mu gihe cy’Iminsi ibiri, amakipe yahise ayandi ndetse n’abakinnyi ku giti cyabo bakurikiranye mu buryo bukurikira.
Amakipe yahize ayandi muri Poomsae
- DREAM FIGHTERS
- BEST CHOICE
- THE MIRROR TA
Amakipe yahize ayandi muri Kyorugi
- DREAM TAEKWONDO CLUB
- DREAM FIGHTERS TC
- UNITY TC
Ibihembo by’abakinnyi bahise abandi muri Poomsae
- Umukinnyi w’Umukobwa: Daniella Galimova
Daniella Galimova wahize muri Poomsae cyangwa se kwiyereka, akinira Ikipe ya Best Choice Taekwondo Academy.
- Umukinnyi w’Umuhungu: Ngabonziza Anick Dadoua
Ngabonziza Anick Dadoua wahize muri Poomsae cyangwa se kwiyereka, akinira Dream Fighters Taekwondo Club.
Ibihembo by’abakinnyi bahise abandi muri Kyorugi
- Umukinnyi w’Umukobwa: Irasubiza Queen Ella
Irasubiza Queen Ella wahize abandi muri Kyorugi cyangwa se kurwana, akinira Dream Fighters Taekwondo Club.
- Umukinnyi w’Umuhungu: Kwizera David
Kwizera David wahize abandi muri Kyorugi cyangwa se kurwana, akinira Unity Taekwondo Club.
Ubwo iyi Shampiyona yasozwaga, hahembwe Umusifuzi wahize abandi, iki gihembo kikaba cyarahawe na Munyaneza Bazir.
Agaruka kuri iyi Shampiyona, Umunyamabanga w’Ishyirahamwe ry’Umukino wa Taekwondo mu Rwanda, Mbonigaba Boniface, mu kiganiro n’Itangazamakuru yagize ati:“Iyi mikino by’umwihariko yitabiriwe n’abakinnyi bari munsi y’Imyaka 14 ndetse n’abatarengeje Imyaka 17. turishimira uko ryagenze. Umubare wari hejuru ku bwitabire, haba amakipe ndetse n’abakinnyi muri rusange”.
“Ritweretse ko ejo hazaza h’Umukino wa Taekwondo hazatanga umusaruro, hashingiwe kuko abakinnyi bitwaye mu Irushanwa nyirizina”.
“Urwego rw’abakiri bato rwarazamutse, uretse ibi kandi, iyo abakinnyi bakina, ubona bafite ubushake kandi biyemeje kwitanga batizigamye, ibi bikaba ari imwe mu nkingi za mwamba z’uyu mukino”.
“Uretse ibi kandi, iyi Shampiyona yateguwe hagamijwe gukora amajonjora y’ibanze y’abakinnyibazakina Shampiyona ny’Afurika y’abakiri bato iteganyijwe kubera mu Rwanda mu Mezi ari mbere”.
Mbonigaba yasoje agira ati:“Amajonjora azakomeza kugeza tubonye abakinnyi bazahesha ishema Igihugu muri aya marushanwa”.
Nyuma y’iyi mikino, Ishyirahamwe ry’Umukino wa Taekwondo mu Rwanda, rizakurikizaho ibikorwa birimo; Irushanwa ryo Kwibuka ku nshuro ya 30 Jenoside yakorewe Abatutsi mu 1994 n’Irushanwa rya Gorilla Open.
Twibutse ko iyi Shampiyona mu byiciro by’Abana, Ingimbi n’Abangavu muri Kyorugi yakinwaga ku nshuro ya kabiri, mu gihe Shampiyona ya Poomsae yakinwe ku nshuro ya mbere.
Ku nshuro ya mbere, yegukanywe n’Ikipe ya Dream Taekwondo Club ikinira mu Karere ka Kicukiro mu Gatenga, umwanya wa kabiri wegukanywe n’Ikipe ya White Stars Taekwondo Club nayo mu Karere ka Kicukiro muri Niboye, mu gihe umwanya wa gatatu wegukanywe n’Ikipe ya Dream Fighters Taekwondo Club ikorera ku Kimironko mu Karere ka Gasabo.
Amafoto
