Nyuma yo kumara iminsi ihitana umuhisi n’umugenzi, Ikipe ya Polisi y’Igihugu, Police FC ntiyabashije kwikura mu Karere ka Huye mu mukino w’Umunsi wa 9 wa Shampiyona y’ikiciro cya mbere wayihuje na Mukura VS&L.
Uyu mukino wakiniwe kuri Sitade mpuzamahanga ya Huye, warangiye Mukura VS&L iwegukanye ku ntsinzi y’ibitego 2-0.
Ibi bitego byatsinzwe na Agyenim Boateng Mensah ku munota wa 39 na Sunzu Mende Bonheur winjiye mu kibuga simbuye, ku munota wa 85.
Iyi ntsinzwi yashyize akadomo ku mikino 7 ya Shampiyona Police FC yari imaze itazi uko gutsindwa bimera.
Muri uyu mukino, umutoza wa Mukura VS&L, Afahmia Lotfi yashyize abakinnyi mu kibuga bahagaze mu buryo bw’imikinishirize bw’abakinnyi 3-5-2.
Mu gihe ku ruhande rwa Police FC, Mashami Vicent yakoresheje uburyo bw’abakinnyi 4-2-3-1.
Rugikubira, Mukura VS&L yatangiye yiharira umukino, binyuze mu bakinnyi bo hagati mu kibuga, Fred Niyonizeye wakinanaga neza na Jordan Dimbumba.
Ku ruhande rwa Mukura VS&L, yacukingiraga hafi rutahizamu Peter Agblevor wa Police FC, washoboraga kuyikoraho isaha iyo ariyo yose.
Igitego Mensah yatsinze muri uyu mukino, cyari icye cya Kane mu mikino 8 ya Shampiyona amaze gukinira iyi kipe yambara Umukara n’Umuhondo
Zimwe mu mpinduka zakozwe n’Umutoza agamije gushimangira intsinzi, ku munota wa 68 yinjije mu kibuga Sannu Bonheur wasimbuye Emmanuel Nsabimana.
Uyu mukinnyi ukomoka muri Repubulika ya Demokarasi ya Congo, yaje kwerekana ko atibeshyweho, kuko ku munota wa 85 yahise anyeganyeza inshundura.
Gusa, yaje guhabwa ikarita y’Umuhondo nyuma yo gukuramo Umwenda (Jezi) yishimira iki gitego, iyi ikaba yaje isanga indi yari yahawe, bityo yerekwa Ikarita Itukura, asohorwa mu Kibuga.
Nyuma y’iyi Karita, Mukura VS&L yakinnye imikino yari isigaye ari abakinnyi 10, ariko ishobora kwihagararaho icyura umukino.
Iyi ntsinzi yashyize Mukura VS&L ku mwanya wa 7 mu makipe 16 n’amanota 13, mu gihe Police FC iri ku mwanya wa 3 n’amanota 15, inyuma ya Gorilla FC ya mbere ifite 18 na Rayon Sports ya kabiri ifite amanota 17.
Kuri uyu munsi kandi, uretse Mukura VS&L yari yakiriye Police FC, Vision FC yari yasuwe na APR FC.
Uyu mukino wakiniwe kuri Sitade yitiriwe Pele i Nyamirambo mu Mujyi wa Kigali, warangiye APR FC iwegukanye ku ntsinzi y’ibitego 2-0 byatsinzwe na Mamadou Sy kuri penaliti ku munota wa 11 n’uwa 50.
Amafoto
