Ikipe ya Rutsino FC yo mu Karere ka Rutsino mu Ntara y’Uburengerazuba na Vision FC yo mu Mujyi wa Kigali mu Karere ka Nyarugenge, zakatishije itike yo kuzamuka mu Kiciro cya mbere cya Shampiyona y’u Rwanda.
Izi Kipe zombi zabonye iyi tike kuri uyu wa Gatatu tariki ya 05 Kamena 2024, mu gihe habura Umukino umwe ngo harangire Imikino ya Kamarampaka (Play-Offs).
Mu mikino yakinwe kuri uyu wa Gatatu, Rutsiro FC yatsinze AS Muhanga ibitego 2-0, mu gihe Vision yatsinzwe na Intare FC ibitego 3-2.
Umukino wahurije Rutsiro FC na AS Muhanga kuri Sitade Mucyebera, Hamza Nkibito yafunguye Amazamu ku munota wa 3, mu gihe ku wa 59, Adolphe Hakizimana yatsinze igitego cya kabiri.
Intsinzi ya Rutsiro FC, yayifashije kugira amanota 10, bityo irusha AS Muhanga amanota 6, mu gihe hasigaye Umukino umwe.
Umukino wahurije Ikipe ya Intare FC na Vision FC, wakiniwe kuri Sitade Ikirenga i Shyorongi, urangira Intare FC itsinze ibitego 3-2.
Biteganyijwe ko imikino ya nyuma ya Kamarampaka, izasozwa ku wa Gatandatu w’iki Cyumweru, Vision FC icakirana na Rutsiro FC kuri Sitade Mumena i Nyamirambo mu Mujyi wa Kigali, mu gihe AS Muhanga izakira Intare FC.
Umukino wa Rutsiro FC na Vision FC, uzasiga ugaragaje Ikipe yegukana Igikombe cya Shampiyona y’Ikiciro cya kabiri Umwaka w’i 2023-24.
- Uko amakipe akurikirana mbere y’umukino w’Umunsi wa nyuma
1. Vision FC — Amanota 10 (+5)
2. Rutsiro FC — Amanota 10 (+2)
3. AS Muhanga — Amanota 4 (-3)
4. Intare FC — Amanota 4 (-4).
