Kuri uyu wa Gatanu tariki ya 18 Kanama 2023, Rayon Sports izasura Gasogi United mu mukino ufungura Shampiyona y’i 2023/24.
Umutoza wa Rayon Sports, Yamen Zelfani, yavuze ko biteguye uyu mukino nk’uko bari biteguye uwa APR FC.
Ati:“Gasogi tuyiteguye nk’uko twari twiteguye APR FC. Buri kipe ikina na Rayon Sports iza imeze nkikina umukino wa nyuma ariko natwe twiteguye neza.”
Zelfani yanakomoje kuri Eid Mugadam Abakar Mugadam, umukinnyi mushya wa Rayon Sports wageze mu Rwanda ku mugoroba wo ku wa Mbere, tariki ya 14 Kanama 2023.
Yagize ati:“Mugadam ni umukinnyi mwiza kuko umwaka ushize yakinnye amatsinda na Al Hilal, akina mu Ikipe y’Igihugu ya Sudani, ni umukinnyi mwiza cyane ufite ubunararibonye azadufasha.”
Aruna Moussa Madjaliwa ni umwe mu bakinnyi Rayon Sports yaguze muri uyu mwaka ariko yari atarayikinira ndetse yakuwe ku rutonde rw’abagombaga gukina Super Cup kubera ikibazo yari afitanye na AS Dauphins Noirs yahoze akinira.
Umutoza Zelfani yavuze ko ibi bibazo byakemutse ubu ari umukinnyi wa Rayon Sports.
Ati:“Kuri Aruna, ubuyobozi bwambwiye ko ibibazo bye byakemutse. Ubu ari kwitegurana n’abandi shampiyona.”
Rayon Sports igiye gutangira umwaka w’imikino ishaka kwegukana Igikombe cya Shampiyona, aho mu mwaka ushize yasoreje ku mwanya wa gatatu inyuma ya APR FC na Kiyovu Sports.