Minisitiri wa Siporo, Munyangaju Aurore Mimosa, yishimiye intsinzi ya Rayon Sports yegukanye Igikombe cya Super Cup cya 2023 itsinze mukeba APR FC, ibitego 3-0 ku mukino wabereye kuri Kigali Pelé Stadium tariki ya 12 Kanama.
Charles Bbaale, Kalisa Rachid na Joackiam Ojera nibo bahagurukije imbaga y’abakunzi ba Rayon Sports bari bitabiriye umukino w’Igikombe gisumba ibindi mu Rwanda gihuza ikipe yatwaye Shampiyona ndetse n’iyatwaye icy’Amahoro.
Minisitiri wa Siporo, Munyangaju Aurore Mimosa, ni umwe mu bayobozi bitabiriye uyu mukino wabereye kuri Kigali Pelé Stadium yari yuzuye abafana b’amakipe yombi.
Uretse gufatanya n’ubuyobozi bwa FERWAFA n’amakipe yombi kwambika imidali abakinnyi, Minisitiri Munyangaju ni we washyikirije Kapiteni wa Rayon Sports, Rwatubyaye Abdul, Igikombe cya Super Cup yegukanye.
Mu butumwa yashyize kuri Twitter nyuma y’umukino, Minisitiri wa Siporo yagize ati “Ohhhhhhh Rayon Sports, mbega ngo muratanga ibyishimoooooo, mwakoze kwegukana Igikombe cya Super Cup.”
Yongeyeho ubutumwa bwo gushishikariza abantu kunywa gake agira ati “ariko twishimire intsinzi tuzirikana KunywaLess.”
