Kuri uyu wa Gatandatu tariki ya 04 Mutarama 2025, Ishyirahamwe ry’Umukino Njyarugamba wa ITF Taekwon-Do mu Rwanda ryatanze Imikandara y’Umukara ku bakinnyi mirongo ine (40) bahize abandi.
Abahawe iyi mikandara, n’abatsinze ikizamini cyatanzwe hagati ya tariki 30-31 Ukuboza 2023.
Yatanzwe na Master Niklas Enender, ufite Dan ya 7 muri ITF Taekwon-Do.
Yahawe abakinnyi barimo abo mu Mujyi wa Kigali, mu Karere ka Rubavu, aka Kirehe no mu Nkambi y’Impunzi ya Mahama.
Uretse abahawe iyi mikandara, uyu munsi, hakoze abandi batanu bifuzaga kuzamurwa mu ntera.
Muri aba batanu, batatu nibo batsinze, mu gihe babiri bazasubiramo mu Kwezi kwa Nyakanga (7) 2025.
Master Niklas Enender watanze iyi mikandara, ari muri komite nyobozi y’Impuzamashyirahamwe ya ITF Taekwon-Do ku rwego rw’Isi.
Uretse kuba muri ITF Taekwon-Do ku rwego rw’Isi, uyu mugabo ukomoka mu gihugu cya Suwede, ashinzwe guteza imbere umukino wa ITF Taekwon-Do ku Mugabane w’Afurika, akaba anawusifura ku rwego mpuzamahanga.
- Amavu n’amavuko y’Ishyirahamwe rya ITF Taekwon-Do mu Rwanda
Umukino wa ITF Taekwon-Do watangiwe gukinwa guhera mu 2012. Kuri ubu, uri kwinjira mu Mwaka wawo wa 13.
Watangijwe na Master Bagire Alain Irene, icyo gihe akaba yari afite Dan ya 3 muri Taekwondo isanzwe.
Nyuma y’Imyaka hafi 13, kuri ubu, Master Bagire afite Dan 3 muri ITF Taekwon-Do.
Igitekerezo cyo gushinga uyu mukino, cyatangiriye kuri Sitade Amahoro, nyuma y’uko Master Bagire abonye ko Taekwondo isanzwe idahagije, kuko hari n’ubundi buryo yakinwamo.
Kuri ubu, abakina umukino wa ITF Taekwon-Do bari hagati ya 200-300 mu gihugu hose.
ITF Taekwon-Do ikinwa mu byiciro bine (4), birimo; Ikiciro cy’ababigize umwuga (Professionals), abari munsi y’Imyaka 17 (Juniors), abakiri bato (Cadets), Abafite Ubumuga (Para- ITF Taekwon-Do) n’abakuze.
Uyu mukino ukinwa mu buryo butandukanye n’ubwa Taekwondo isanzwe isanzwe, kuko abawukina bahangana mu buryo bwuzuye (Full Combats).
Bimwe mu bikoresho by’ingenzi byifashishwa, birimo; Kasike (Head protecter), Ga (Gloves), Ibirinda amaboko, ibirinda amaguru, ibirinda imyanya y’ibanga n’ibirinda ibirenge.
Uretse kuba uyu mukino uri mu rugendo rwo gushinga imizi imbere mu gihugu, intego n’uko abawukina bazegukana Imidali habmu Karere, muri Afurika no ku rwego rw’Isi.
Kugeza ubu, Master Bagire Alain Irene, Uwayezu Theoneste na Munyaneza Basile n’ibo bafite Imikandara iruta iy’abandi. Bafite Umukandara w’Umukara Dan ya 3.