Abahanzi barimo Riderman, Kivumbi King na B-Threy bagiye gususirutsa abanya-Kigali mu gitaramo cyahawe inyito ya ‘European Street Fair’ gisanzwe gitegurwa n’Umuryango w’Ubumwe bw’u Burayi (EU).
Biteganijwe ko iki gitaramo kizaba ku wa Gatandatu tariki 3 Kamena 2023 guhera saa kumi n’imwe z’umugoroba (5:00Pm) mu Imbuga City Walk mu Mujyi rwagati.
Umuryango w’Ubumwe bw’u Burayi, uvuga ko muri rusange, iki gitaramo ari amahirwe ku babarizwa mu Inganda Ndangamuco yo ‘kugaragaza cyangwa se kumurika impano zabo’. Bati “Ntimuzacikwe n’iki gitaramo.”
Ibi bitaramo bisanzwe bihuza ibihumbi by’abantu bahurira imbere y’ahazwi nko kwa Makuza, bikayoborwa n’umushyushyarugamba ubimazemo igihe kinini Nkusi Arthur. Ni mu gihe Dj Infinity ariwe uzifashishwa mu kuvanga imiziki.
Iki gitaramo ngaruka mwaka gihuriza hamwe urubyiruko rukidagadura, kandi gifasha abafite impano mu ngeri zinyuranye kuzigaragaza, kwinjira biba ari ubuntu.
Kirangwa n’ibikorwa bitandukanye birimo ibifasha abana kuruhuka. Cyagiye gitanga akazi ku bahanzi bo mu Rwanda.
Mu bihe bitandukanye cyaririmbyemo abahanzi barimo Butera Knowless, Sintex, Charly&Nina, Siti True Karigombe n’abandi.
Riderman ategerejwe muri iki gitaramo mu gihe aherutse gushyira hanze indirimbo yise ‘Nta busutwa’.
Ni indirimbo yivugamo ibigwi, inzira yanyuze n’icyerekezo cye. Anakomoza ku kuntu yasimbutse inshuro ebyiri uburozi.
Uyu muhanzi amaze imyaka irenga 15 mu muziki, anafite indirimbo yise ‘I miss you’ yahimbye akumbuye umugore we ubwo yari i Burayi mu bitaramo.
Arazwi cyane mu ndirimbo nka ‘Inyunguti ya ‘Icupa ry’imiti’, ‘Padre’, ‘Haje gushya’ n’izindi…
Bwiza, uyu muhanzikazi ubarizwa mu inzu ifasha abahanzi mu bya muzika ya Kikac arazwi cyane binyuze mu ndirimbo zirimo ‘Ready’, ‘Exchange’, ‘Mi Amor’ n’izindi.
Muri iki gihe ari kwitegura gushyira hanze album ye ya mbere azamurika mu gitaramo azakora mu Ukwakira 2023.
Uyu mukobwa umaze imyaka ibiri mu muziki, aherutse guteguza indirimbo ye nshya yise ‘Do Me’.
Kivumbi King ni umwe mu baraperi batanga icyizere bigaragaje kuva mu myaka itatu ishize.
Uyu musore aherutse gutungurana aririmba mu gitaramo Intore Sundays cyabaye ku Cyumweru tariki 28 Gicurasi 2023.
Yahuriye ku rubyiniro n’abahanzi Pcee ndetse na Justin99 bo muri Afurika y’Epfo, basanzwe bazwiho kuvanga imiziki [Djs] yubakiye ku mudiho wa Amapiano.
Umuhanzikazi Bwiza
