Umunya-Brésil Roberto Oliveira Gonçalves do Carmo “Robertinho” yatangajwe nk’Umutoza Mukuru wa Rayon Sports, kuri uyu wa Mbere, tariki ya 22 Nyakanga 2024.
Ikipe ya Rayon Sports yemeje ko yumvikanye na Robertinho nk’umutoza wayo mukuru mushya mu itangazo yanyujije ku Rukuta rwayo rwa X.
Robertinho yasubiye muri Rayon Sports yafashije kwandika amateka akomeye, ikigenderaho na magingo aya.
Uyu Munya-Brésil w’imyaka 64 yagejeje Rayon Sports mu mikino ya ¼ cya CAF Confederation Cup mu 2018 ndetse ayifasha kwegukana Igikombe cya Shampiyona mu 2019. Yayivuyemo yerekeza muri Gor Mahia yo muri Kenya.
Robertinho yerekeje muri Rayon Sports, asimbuye Umufaransa Julien Mette, watandukanye na yo muri Kamena 2024.
Uyu Munya-Brésil yongeye kumvikana na Rayon Sports nyuma yo gutandukana na Simba SC yo muri Tanzania mu Ugushyingo 2023.
Yageze muri Tanzania, avuye muri Vipers SC yo muri Uganda yagezemo muri Kanama 2021, ayifasha gutwara Uganda Premier League no kuyigeza mu matsinda ya CAF Champions League bwa mbere mu mateka yayo.
Rayon Sports igeze kure imyiteguro y’umwaka w’imikino wa 2024/25, ndetse imaze gusinyisha abakinnyi icyenda bashya, barimo Umunyezamu Ndikuriyo Patient, Fitina Omborenga, Ndayishimiye Richard, Omar Gning, Niyonzima Olivier ‘Seif’, Ishimwe Fiston, Nshimiyimana Emmanuel, Rukundo Abdul Rahman, Haruna Niyonzima na Prinsse Elenga-Kanga.
