Mu ijoro ryakeye, hakinwe imikino y’umunsi wa 21 muri Shampiyona y’Ubwongereza izwi nka ‘English Premier League’.
Iyi shampiyona ikundwa n’abatari bacye ku Isi by’umwihariko no mu Rwanda, isigaje imikino 17 ngo ishyirweho akadomo, kuko umwaka ukinwamo imikino 38.
Gusa, n’ubwo imikino umuntu yavuga ko ntaho irajya, ugutungurana kurakomeje kandi amakipe ahatanira iikombe akomeje kwifata impungenge.
Abakunzi b’amakipe ya; Liverpool, Manchester City na Chelsea baraye baryamye bimpfumbase, nyuma y’uko amakipe yabo atabonye intsinzi mu gihe nyamara aricyo bari bayakeneyeho.
Liverpool iyoboye urutonde rw’agateganyo, yari yasuye Nottingham Forest iri ku mwanya wa kabiri, Chelsea ya kane yisobonuraga na A.F.C. Bournemouth ya karindwi, mu gihe Manchester City ya gatandatu yari ku kibuga cya Brentford ya 10.
Aya makipe yombi yatashye yifashwe mampfubyi, kuko nta nimwe yigeze ibona intsinzi.
Liverpool yanganyije na Nottingham Forest igitego 1-1, Chelsea inganya na Bournemouth ibitego 2-2, ibi bitego kandi ni nabyo byabonetse mu mukino wahuje Manchester City na Brentford.
Mu mukino Liverpool yari yasuyemo Nottingham Forest, Chris Wood yafunguye amazamu ku munota wa 8 mu gihe Diogo Jota yatsindiye Liverpool ku munota wa 66.
Mu mukino wa Machester City na Brentford, ibitego byatsinzwe na Yoane Wissa ku munota wa 82 na Christian Nørgaard ku munota wa 90+2.
Ku ruhande rwa Manchester City, inshundura zanyeganyijwe na Phil Foden ku munota wa 66 n’uwa 78.
Chelsea na Bournemouth nabo byari ibicika, kuko umukino w’impande zombi wagaragayemo ibitego bine.
Ibitego bya Chelsea yari mu rugo, byatsinzwe na Cole Palmer ku munota wa 13 na Reece James ku wa 90+5, mu gihe ibya Bournemouth byatsinzwe na Justin Kluivert kuri penaliti munota wa 50 na Antoine Semenyo ku munota wa 68.
Uretse iyi mikino, Westham United yatsinze Fulham ibitego 3-2.
Amafoto
