Ntawukira asongwa: Arsenal yagaruye Saka ivunikisha Gabriel Magalhaes na Julien Timber

Ikipe ya Arsenal ikomeje kuba mu rungabangabo mu gihe Umwaka w’imikino w’i 2024-25 uri kugana ku musozo.

Muri uyu mwaka, Arsenal ihanze amaso ibikombe 2 muri 4 byashobokaga. Isigaye muri UEFA Champions League aho izacakirana na Real Madrid muri 1/4 mu gihe muri Shampiyona y’Ubwongereza iri ku mwanya wa kabiri inyuma ya Liverpool iyirusha amanota 9.

Mu gihe urugamba rw’ibi bikombe byombi rugeze mu mahina, Arsenal iri kugarizwa n’imvune uko bwije n’uko bucyeye.

N’ubwo imvune zikomeje kuyikoma mu nkokora, ariko irishimira ko hari n’abari gukira.

Mu bari gukira, harimo Bukayo Saka wagarutse mu kibuga mu ijoro ryakeye, nyuma y’Amezi hafi 4 avunitse. Saka yaherukaga mu kibuga mu Kwezi k’Ukuboza [12] k’Umwaka ushize.

Mu mukino Arsenal yaraye itsinzemo Fulham ibitego 2-1, Saka yawutsinzemo igitego cyatanze intsinzi.

Nyamara n’ubwo bishimiraga igaruka rya Saka no kubona amanota 3, Arsenal yavunikishije abakinnyi babiri bakina mu bwugarizi.

Aba bakinnyi ni Gabriel Magalhaes myugariro wo mu mutima w’ubwugarizi na Julien Timber, myugariro w’inyuma ku ruhande.

Gabriel Magalhaes wari watangiye mu kibuga, yasimbuwe na Jacob Kiwior, nyuma y’uko ku munota wa 16 gusa w’umukino, agaragaje ko atagifite ubushobozi bwo kuwukomeza.

Mu gihe Arteta yibazaga uko azabigenza mu mikino iri imbere na Gabriel, ku munota wa 77 yongeye kwifata impungenge, ubwo Julian Timber yasohokaga mu kibuga nabwo kubera imvune.

Nyuma yo kuva mu kibuga kwa Julian Timber, Arteta yahisemo ahindurira umwanya Thomas Partey wari watangiye umukino akina hagati mu kibuga, agarurwa ku ruhande rwakinagaho Timber.

Timber na Gabriel basanze hanze myugariro w’Umutaliyani, Riccardo Calafiori, Umwongereza Benjamin White, Umuyapani Takehiro Tomiyasu, Umukinnyi mpuzamahanga ukomoka mu Budage Kai Harvetz n’Umunya-Brazil Gabriel Jesus.

Mu mikino ihanzwemo amaso, Arsenal ifite umukino wa Shampiyona uzayihuza na Everton mu mpera z’iki Cyumweru, mu gihe izahita yisobanura na Real Madrid mu mikino ya 1/4 cya UEFA Champions League.

Amafoto

Leave a Reply

Your email address will not be published. Required fields are marked *