Mbere y’uko Rayon Sports yakira APR FC mu mukino w’ikirarane cy’umunsi wa gatatu wa shampiyona kuri uyu wa Gatandatu tariki ya 07 Ukuboza 2024, mu mukino uzakinirwa muri Sitade Amahoro ku isaha ya saa 18:00, amakipe yombi yari mu kibuga mu ijoro ryakeye, akina imikino y’umunsi wa 12.
APR FC yari yakiriye Police FC, mu gihe Rayon Sports yakinaga na Muhazi FC. Iyi mikino yombi yakiniwe kuri Sitade yitiwe Pelé i Nyamirambo, mu Mujyi wa Kigali.
Umukino APR FC yari yakiriyemo Police FC warangiye impande zombi ziguye miswi y’igitego 1-1. Police FC niyo yabanje gufungura amazamu hakiri kare ku munota wa 10, ku gitego cyantsinzwe na Abedi Bigirimana.
APR FC yaje guhita isubiza byihuse, kuko ku munota wa 24, Aliou Souané yahise akishyura, ndetse umukino urangira gutya.
Mu mukino wahuje Rayon Sports na Muhazi FC, Rayon Sports yahanyuze yemye, kuko yegukanye intsinzi y’ibitego 2-1.
Ibitego bya Rayon Sports byatsinzwe na Niyonzima Olivier uzwi nka Sefu, ku munota wa 11 n’uwa 23, mu gihe kimwe rukumbi cya Muhazi FC cyatsinzwe na Nicholas Kagaba ku munota wa 56.
Niyonzima Olivier yatsinze ibi bitego nyuma yo kumara hafi amezi abiri atabona umwanya mu ikipe ya Rayon Sports.
Gukina uyu mukino ndetse akanawitwaramo neza, abakunzi ba Rayon Sports babifashe nk’uburyo bwiza bwo kumutegurira umukino uzahuza iyi kipe na APR FC.
Iyi ntsinzi kandi, isobanuye ko mu mikino 11 imaze gukina, Rayon Sports imaze gutsindwa umukino umwe gusa, kuko imikino 11 yose iyimaze itazi icyo gutsindwa aricyo.
Igitego cya mbere yagitsinze ku mupira wari utewe na Omborenga Fitina kuri kufura (Free Kick), mu gihe icya kabiri yagitsinze kuri Koruneri (Corner), yatewe na Muhire Kevin.
Gutsinda Muhazi FC, byafashije Rayon Sports kuyobora urutonde rw’agateganyo rwa shampiyona n’amanota 29 mu mikino 11 imaze gukina, ikaba irusha APR FC iri ku mwanya wa kane, amanota 9. Gusa, APR FC imaze gukina imikino 9. Buze ko igifite imikino 2 y’ibirarane.
Igitego cya Nicholas Kagaba nicyo cya mbere Umunyezamu wa Rayon Sports, Khadime Ndiaye mu mikino 9 yari ishize atinjizwa.
Ku ruhande rwa APR FC, mbere yo guhura na Rayon Sports, isaruye amanota 4 kuri 6 yashobokaga. Yakuye amanota 3 kuri Muhazi n’inota yakuye kuri Police FC.
N’ubwo APR FC itabonye intsinzi mu mukino yakinnyemo na Police FC, yayinyuze mu myanya y’intoki, kuko ku munota wa 44 w’umukino, Mamadou Sy yahushije Penaliti yafashwe neza n’Umunyezamu wa Police FC, Onesime Rukundo.
Iyi Penaliti yakozwe na Bigirimana wasunitse Lamine Bah amutura hasi mu rubuga rw’amahina. Gusa, Umutoza wa Polisi FC, Mashami Vicent, yavuze ko itari yo kuko Lamine Bah ngo yigwishije.
Nyuma y’uyu mukino, Mashami yifatiye ku gahanga abasifuzi, abashinja kutamubanira, cyane Jean Paul Ngabonziza wari umusifuzi wo hagati.
Ati:“Ndatekereza ko iriya Penaliti itari yo”.