Umushumba wa Diyosezi Gatolika ya Gikongoro, Musenyeri Célestin Hakizimana, yasoje Icyumweru cyahariwe Uburezi Gatolika muri iyi Diyosezi iherereye mu Ntara y’Amajyapfo ashyira u Burengerazuba bw’u Rwanda.
Gusoza iki Cyumweru byakozwe kuri uyu wa 30 Gicurasi [5] 2025, mu Muhango wakorewe kuri Paruwasi ya Nyarunyinya.
Iki Cyumweru cyari gifite Insinganyamatsiko igira iti:“Turangamiye Kiristu, Ishuri ryacu ribe Igicumbi cy’Amizero, Ubuvandimwe n’Amahoro”.
Uyu muhango wabereye kuri Paruwasi ya Nyarunyinya, witabiriwe n’abanyeshuri, abarezi, ababyeyi n’abayobozi b’Amashuri ya Kiliziya by’umwihariko abarizwa muri iyi Diyosezi.
Ibirori byo gusoza iki Cyumweru, byabimburiwe n’Igitambo cya Misa cyasomwe na Musenyeri, Célestin Hakizimana.
Musenyeri Célestin Hakizimana yagituye afatanyije n’Abapadiri bashinzwe serivisi z’Uburezi n’Uburere muri iyi Diyosezi.
Mu butumwa yageze abitabiriye isozwa ry’iki Cyumweru, Musenyeri Hakizimana yibukije ko ‘Ishuri ryubakiye ku mahame ya Gikiristu rirerera Igihugu, abaturage barangwa n’ubumuntu n’ubutwari bufite imizi mu kwemera’.
Iyi Misa yakurikiwe n’ibirori byaranzwe n’ibikorwa bitandukanye by’imyidagaduro birimo ‘Imivugo, Indirimbo n’Imbyino z’Umuco Nyarwanda, by’umwihariko zateguwe n’abanyeshuri bo mu mashuri ya Gatolika abarizwa muri iyi Diyosezi.
Imbyino n’Imivugo ya Kinyarwanda byeretwe abitabiriye ibi birori, n’ibyahize ibindi hashingiwe ku Nsanganyamatsiko y’uyu mwaka.
Amashuri yatsinze neza mu bikorwa by’umuco, ibihangano n’ubumenyi, yahawe ibihembo birimo ibikoresho by’ishuri n’ibihembo by’ishimwe.
Bimwe muri ibi bihangano, birimo icy’Umunyeshuri w’Umukobwa wiga ku Ishuri ribanza rya Mushubi, wakoze Igihangano gisobanura neza icyerekezo cy’Uburezi Gatolika.
Iki gihangano cye, cyagaragazaga akamaro ku kubaka amahoro mu bakiri bato.
Ku ruhande rw’Abarezi, uwavuze mu izina ryabo, yagaragaje ko Uburezi Gatolika budatanga ubumenyi gusa, ahubwo burerera u Rwanda rufite umutima w’urukundo.
Icyumweru cy’Uburezi Gatolika cyatangiye kwizihizwa mu Rwanda kuva mu 2008, kigamije kwerekana uruhare rukomeye rwa Kiliziya Gatolika mu burezi bw’igihugu.
Buri mwaka Kiliziya ishyiraho Insanganyamatsiko igaragaza intego by’uburezi bushingiye ku ndangagaciro za Gikirisitu.
Umwaka utaha hitezwe gukomeza kuzamura ubwitabire n’ubwiza bw’ibi bikorwa mu rwego rwo gufasha abana gukura neza mu bwenge no mu kwemera.
Uretse aha muri Diyosezi ya Gikongoro, gusoza Icyumweru cy’Uburezi Gatolika byakozwe no mu yandi ma Diyosezi Gatolika mu gihugu hose.
Amafoto
