Ku gicamunsi cyo kuri uyu Gatatu, i Muhanga mu Murenge wa Mushishiro hashyinguwe abana 10 bapfiriye mu mpanuka y’ubwato yabereye mu mugezi wa Nyabarongo hafi y’urugomero rw’amashanyarazi.
Imibiri ine y’aba bana ni yo yabanje kuboneka ku wa Kabiri mu gihe itandatu yarohowe kuri uyu wa gatatu, nyuma y’ubutabazi bwa Polisi ishami rishinzwe ubutabazi bwo mu mazi.
Umwe mu babuze abana muri iyi mpanuka Uwitonze Venuste akaba ashima ababafashe mu mugongo.
Guverineri w’Intara y’Amajyepfo, Kayitesi Alice yatanze ubutumwa bwa leta y’u Rwanda bwihanganisha iyi miryango ariko anakomoza ku busabe bw’abaturage bifuza ko uburyo bwo kwambuka bwanozwa kuko babeshejweho no guhahirana n’abo hakurya mu Karere ka Ngororero.
Ibikorwa byo gushakisha imibiri y’aba bana no kubashyingura byakozwe na Leta.
Aba bana b’abahungu 10 babuze ubuzima bose bigaga mu mashuri abanza.
Uko iyi mpanuka yagenze
Ku wa mbere w’iki Cyumweru tariki ya 17 Nyakanga 2023, nibwo Ubwato bwavaga mu Murenge wa Mushishiro mu Karere ka Muhanga bwerekeza mu ka Ngororero.
Ubu Bwato bwari butwaye abana bari hagati y’imyaka 9 na 13.
Mu bantu baburimo, harokotse batatu n’Umusare wari ubutwaye, 10 bahasiga ubuzima.
Abarohamiye muri Bwato barimo: Komezumfashe Antoine w’imyaka 9, Sempundu Yeremiya w’imyaka 11, Ntakirutimana Gervais w’imyaka 10, Uwiringiye Kelly w’imyaka 10, Uwihoreye Vedaste w’imyaka 10, Samuel Niwegisubizo w’imyaka 10, Serge Niyonsenga w’imyaka 11, Niyorukundo Cedric w’imyaka 12, Ndahimana Irene w’imyaka 13 na Itangishatse Stanislas w’imyaka 13.
Abana barokoka iyi mpanuka ni Niyorukundo Fabrice w’imyaka 12, Irakoze Cedric w’imyaka 12 na Alexandre Imanaturikumwe w’imyaka 10.
Mu bapfuye, harimo abishywa babiri ba Ndababonye Jean Pierre w’imyaka 42. Aba ni Komezumfashe Antoine na Niyorukundo Cedric.
Nyuma yo kurohoma, imibiri y’abana bane yabonetse tariki ya 18 Nyakanga 2023, indi ikaba yabonetse kuri uyu wa gatatu, ku butabazi bwatanzwe n’ishami rya Polisi y’u Rwanda ryo mu mazi.
