Rutahizamu mpuzamahanga w’Umunyarwanda, Sugira Ernest kuri ubu nta kipe afite nyuma yo gusoza amasezerano yari afitanye n’ikipe ya Al Wahda yo muri Syria.
N’ubwo yari yasinye amasezerano y’imyaka ibiri n’iyi kipe mu mwaka ushize, impande zombi zemeranyijwe gutandukana ku bwumvikane nyuma y’umwaka uwe gusa yari ayimazemo.
Kuri ubu, uyu rutahizamu nta kipe afite, gusa ahanze amaso kugaruka muri Shampiyona y’u Rwanda, mu gihe biteganyijwe ko itangira mu kwezi gutaha kwa Kanama (8).
Nyuma yo gutandukana na Al Wahda, Sugira yagize ati:”Nari nkifite umwaka w’amasezerano n’iyi kipe, ariko ku bwumvikane bwacu twahisemo gutandukana”.
Yunzemo ati:”Ntago ari ihame gukomeza gukina hanze y’Igihugu cyange (Rwanda), ahubwo ngomba no kugaruka kongera gukina mu Rwanda”.
Ku myaka 32 y’amavuko, mbere yo gusinya muri Al Wahda muri Kanama (8) y’umwaka ushize, Sugira yanyuze muyandi makipe arimo; AS Muhanga, Rayon Sports, APR, AS Kigali yombi yo mu Rwanda ndetse na AS Vita Club yo muri Repubulika ya Demokarasi ya Congo.