Ndizeye Aimé Désire ‘Ndanda’ yongeye kugaruka muri APR FC yakoreyemo amateka nk’Umunyezamu wayo mu myaka ishize, aho kuri ubu yahawe amasezerano y’imyaka ibiri (2) ashobora kongerwa, atoza abanyezamu bayo.
Nyuma yo gusinya aya masezerano, uyu wakanyujijeho mu ikipe y’Igihugu y’Uburundi, yatangiye akazi ku Cyumweru gishize nyuma yo gushyira umukono ku masezerano .
Muri izi nshingano, azafatanya na Alexis Mugabo wari umaze imyaka 4 ku mwanya wo gutoza abanyezamu ba APR FC.
Ndanda ni umwe mu banyezamu bamaze muri APR FC igihe kirekire kuva yayijyamo mu 1999 avuye mu Burundi.
Yamaze imyaka 10 muri iyi kipe, kuko yayibayemo guhera mu 1999 kugeza mu 2009 ubwo yatandukana nayo.
Mu myaka 10 yakiniye APR FC, yegukanyemo shampiyona 7, ibikombe bya CECAFA 2, n’ibikombe 6 by’Amahoro.
Ni umwe mu bari mu ikipe ya APR FC ifatwa nk’iyakoze ibidasanzwe mu mateka ya ruhago Nyarwanda, ubwo yanyagiraga igihangange cyo mu Misiri, Zamalek mu mikino ya CAF Champions League mu mukino wabereye kuri Sitade Amahoro i Remera.
Ndanda agiye kongera gukorana na Rtd Captain Eric Ntazinda wagizwe ushinzwe ubuzima bwa buri munsi bw’iyi kipe, nyuma y’uko bombi babanyemo hagati y’umwaka w’i 2003 kugeza mu 2009.
Aba bombi kandi batangajwe mu gihe APR FC yemeje ko yasinyishije Khouda Karim nk’umutoza wungirije, mu gihe Dr Adel Zrani yahawe akazi ko kongerera imbaraga abakinnyi.
Iri tsinda ry’abatoza rikaba rizakorana n’umutoza mukuru w’Umufaransa, Thierry Froger watangajwe ku wa 2 w’iki Cyumweru.
Ku Cyumweru gishize tariki ya 16 Nyakanga 2023, nibwo APR FC yatangiye imyitozo yitegura umwaka mushya w’imikino, aho isanzwe ikorera i Shyorongi.
Ni imyitozo yitabiriwe n’abakinnyi bose barimo n’abashya bongewe muri iyi kipe.
APR FC izatangira umwaka mushya w’imikino w’i 2023/24 tariki ya 12 Kanama 2023, mu mukino w’igikombe kiruta ibindi uzayihuza na Rayon Sports kuri Sitade yitiriwe Pele i Nyamirambo.
Nk’ikipe yegukanye igikombe cya shampiyona 2022/23, APR FC izahagararira u Rwanda mu mikino ya CAF Champions League.
