Ku wa Gatandatu w’Icyumweru gishize tariki ya 08 Nyakanga 2023, nibwo Kiyovu Sports yatangaje ko yatandukanye na Kimenyi Yves wari uyimazemo Imyaka 3.
Kuva yayigeramo tariki 27 Gicurasi 2020 avuye muri mukeba Rayon Sports, Kimenyi ni umwe mu bakinnyi Kiyovu Sports yakunze kugenderaho mbere y’uko imusezerera.
Ubwo yerekezaga muri Kiyovu Sports, yatanzweho Miliyoni 16 Frw, ahita aca agahigo ko kuba ariwe Munyezamu uhenze mu mateka ya Shampiyona y’u Rwanda.
Gusa, iyi myaka itatu yamaze muri Kiyovu Sports, yarazwe no kuzamuka no kumanuka, bitatanze Igikombe cya Shampiyona nk’inshingano nyamukuru yari yaguriwe.
Uretse Igikombe cya Shampiyona, nta n’ikindi yayifashije kwegukana, uretse gusoreza ku mwanya wa kabiri wa Shampiyona inshuro ebyiri zikurikiranya (2021/22, 2022/230.
Ni umwe mu bakinnyi batari bake bahambirijwe n’iyi kipe nyuma y’uko umuyobozi wayo Jean François Régis Ndorimana, atangaje ko hari bamwe mu bakinnyi barimo abakomeye bayigambaniye bakayibuza kwegukana Igikombe cya Shampiyona.
Gusa, icyo gihe ntawe yigeze atunga agatoki mu mazina, ariko nyuma y’iyi mvugo, abatari bake beretswe umuryango by’umwihariko abarimo abafatwaga nk’inkingi za mwamba.
Bimwe mu byababaje ubuyobozi bwa Kiyovu Sports by’umwihariko abakunzi bayo, ni ukuba muri iyi myaka ibiri ya Shampiyona (2021/22 na 2022/23), yombi iyi kipe yabaga ifite igikombe mu biganza, ikakirekurira APR FC mu minsi ya nyuma.
Atandukanye na Kiyovu Sports mu gihe nyamara mu mwaka w’imikino w’i 2021/22 yatowe nk’Umunyezamu wahize abandi n’ubwo ikipe ye yabuze Igikombe cya Shampiyona.
Mu mikino 30 ya Shampiyona yakinnye muri uwo mwaka, yinjijwe gusa ibitego 16.
Ushyize ku mpuzandengo, byibuze yinjizwaga igitego kimwe mu mikino ibiri.
Nyuma yo guterwa Umugongo, amerekezo araba ayahe?
Imyaka 10 amaze muri Shampiyona y’u Rwanda, amakipe yose y’ibigugu amaze kuyazenguruka, ibi bikaba bishobora kumubera umuryango umwerekeza mu Karere no ku ruhando rwa Afurika bikunze.
Gusa, ikipe ya Polisi, Police FC ni imwe mu makipe akomeje kumucungira hafi, mu gihe Ntwari Fiacre yari yizeye yamaze kwerekeza muri Shampiyona ya Afurika y’Epfo mu ikipe ya TS Galaxy.
Umutoza wa Police FC, Mashami Vicent wanakoranye na Kimenyi mu ikipe y’Igihugu, atangaza ko ijisho rye ritari kujya kure ye.
Mu gihe ibiganiro hagati y’impande zombi byatanga umusaruro, uyu Munyezamu yasinya muri iyi kipe bitarenze iki Cyumweru.
AS Kigali ni imwe mu makipe ari gutungwa agatoki ko yayerekezamo, ariko amahirwe ni make bitewe n’ikibazo cy’ubukungu (Amikoro) ifite, byanatumye uwari umuyobozi wayo Shema Fabrice ayisezeraho.
Nyuma yo gutandukana n’abarimo Kimenyi, Kiyovu Sports yamusimbuje Umugande Emmanuel Kalyowa wasinye amasezerano y’imyaka itatu (3).
Urucaca rwerekeje amaso kuri Kalyowa w’imyaka 27 nyuma y’uko Nicholas Sebwato ahisemo kuguma muri Mukura VS&L, na Simon Tamale bari bimvikanye ahisemo kugana muri Rayon Sports.
