Minisitiri w’ububanyi n’amahanga wa Botswana yabwiye shene ya televiziyo yo muri Afurika y’Epfo ko “Leta y’Ubwongereza” yiyambaje igihugu cye ibabaza niba bakwakira abimukira birukanwa mu Bwongereza.
Minisitiri Lemogang Kwape ntiyavuze igihe leta y’Ubwongereza yabiyambaje.
Avuze ibi nyuma y’amakuru ataremejwe yatangajwe mbere muri uku kwezi mu binyamakuru byo mu Bwongereza, avuga ko leta y’Ubwongereza yari irimo gushaka gukorana na Botswana, Armenia, Côte d’Ivoire na Costa Rica muri gahunda nk’iyo ifitanye na leta y’u Rwanda.
Mu kiganiro kuri telefone yagiranye na televiziyo Newzroom Afrika, Minisitiri Kwape yavuze ko Botswana yanze ubwo busabe avuga ko bwatanzwe na minisitiri w’ububanyi n’amahanga w’Ubwongereza hamwe na minisitiri ushinzwe Afurika babinyujije “mu nzira za dipolomasi”.
Kwape yavuze ko Botswana idashobora kwemera kwakira abimukira bavuye mu Bwongereza kuko na yo ihanganye n’ibibazo byayo bwite by’abinjira mu gihugu.
Yagize ati: “Leta y’Ubwongereza ntishaka aba bantu mu gihugu cyayo rero barashaka [irashaka] kubahamba [kubashyingura] mu gihugu cya kure cyane…
“Kwakira abinjira mu gihugu badashakwa bavuye mu kindi gihugu, mu gihe turimo guhangana n’ibibazo byacu bwite mu karere byaba ari uguhemukira Botswana.” (BBC)
