Muri Koreya y’Epfo, inyoni zakoze ibara ziteza impanuka y’indege ikomeye kuri iki cyumweru.
Iyi Indege itwara abagenzi yavaga muri muri Tayilande yerekeza muri Koreya y’Epfo yahitanye abantu 179.
Iyi ndege y’ikompanyi ya Jeju Air yari itwaye abagenzi 181. Abo mu nzego z’ubutabazi bari aho iyi mpanuka y’indege yabereye ni bo bagaragaraga cyane haba ku mafoto cyangwa kuri videwo yasohowe n’ibiro ntaramakuru by’abafaransa AFP.
Iyi ndege ya Jeju Air, yavaga mu mujyi wa Bangkok muri Tayilande yerekeza mu mujyi Muan wo muri Koreya y’Epfo.
Impanuka nk’iyi itarigeze iba muri Koreya y’Epfo, birashoboka ko yabaye bitewe n’uko iyi ndege yagonganye n’inyoni.
Uko amasaha ashira ni ko amahirwe yo kubona abashobora kuba barokotse iyimpanuka agabanuka.
Ubuyobozi bwatangaje ko iyi mpanuka yabaye mu masaha y’i saa cyenda z’ijoro ndetse buvuga ko hari impuruza zatanzwe ko iyo ndege igonganye n’inyoni.
Hashize iminota ibiri, umupilote wayo nawe, yatanze ubutumwa bw’umuburo atangira kururutsa indege ariko biranga.
Uretse kuba inyoni arizo zabaye nyirabayaza mu mpanuka y’iyi ndege, biranavugwa ko ikirere kitari kimeze neza.
Gusa, umuyobozi w’urwego rushinzwe kuzimya inkongi z’umuriro Lee Jeong-hyun mu mujyi wa Muan yavuze ko amakuru nyayo azatangazwa nyuma y’uko iperereza rirangiye.
Iyi ndege yakoze impanuka yari iyo mu bwoko bwa Boeing 737-8AS, yatangiye gukora muri 2009. (VoA)