Abahinzi bahinga imboga, ibigori n’ibindi bihingwa ku butaka bwahujwe buri ahitwa Ntete mu Murenge wa Kiramuruzi ho mu Karere ka Gatsibo, baravuga ko babangamiwe n’uko imashini ikogota amazi mu kiyaga cya Muhazi bikabafasha muri ubwo buhinzi ubu yapfuye, bikaba bibateza igohombo ari naho bahera basaba ko bafashwa iyo mashini igasanwa.
Ni ikibazo ubuyobozi bw’Akarere buvuga ko bugiye kwihutira gushakira igisubizo n’abo bahinzi babigizemo uruhare.
Ni ubutaka bw’abaturage bari basanganywe buza guhuzwa bungana na hegitari 10 ndetse bushyirwamo n’uburyo bwo kuhira hifashishijwe imbaraga z’imirasire y’izuba zifashishwa mu gukogota amazi mu kiyaga cya Muhazi, agafasha abahinzi kuhira imyaka yabo imusozi.
Ni umushinga aba baturage bafashijwemo n’ubuyobozi bw’Akarere ka Gatsibo bufatanije n’umushinga Hinga Weze aho ubusanzwe hakoreshwaga imashini ebyiri mu gukogota ayo mazi.
Ikibazo cyaje kuvuka aho imwe muri izo mashini ipfiriye, bituma abahinzi basigara bakoresha imashini imwe yonyine bagasaranganya amazi ikogose.
Bumvikanisha ko umuvuduko mu buhinzi wakomwe mu nkokora.
Icyifuzo cyabo ni uko bafashwa iyi mashini ya kabiri igakorwa bakongera guhinga seasons zose nkuko byahoze.
Twashatse kumenya icyo Akarere ka Gatsibo kavuga kuri iki kibazo maze umuyobozi wako, Gasana Richard avuga ko iki kibazo nk’Akarere batari bakizi nubwo abahinzi bo bavuga ko kimaze imyaka ibiri.
Gusa uyu muyobozi asobanura uburyo mu gihe cya vuba nk’ubuyobozi bagiye kugishakira umuti ariko ngo n’abahinzi bakaba bagomba kubigiramo uruhare.
Mu buryo busanzwe iyo izo mashini zikora zombi zifite ubushobozi bwo gufata amazi angana na metero cube 617 yuhira ku buso bwa hegitari 10 z’ubutaka bwahujwe, abahinzi bakaba barafashe ayo mahirwe bahinga ibihingwa bikenera amazi cyane nk’imboga zirimo inyanya, amashu, imiteja ndetse n’ibishyimbo hakaniyongeraho n’ibigori, gusa ngo muri iki gihe ubu buhinzi bwajemo imbogamizi kubera iyo mashini yagize ikibazo. (RBA)