Abitabiriye Inama ya Golden Business Forum iri kubera i Kigali mu Rwanda, igaruka ku maseserano y’Isoko rusange rya Afurika (AfCFTA), basabwe gusaba Ibihugu gushyira mu ngiro aya masezerano ndetse nabo ubwabo, mu gihe bitakorwa akazahora ari amasigara kicaro.
Iyi nama yatangiye kuri uyu wa Gatatu tariki ya 16 kugeza ku wa Kane tariki ya 17 Kanama 2023, abayitabiriye basabwe by’umwihariko kwita ku iterambere ry’Inganda nto n’iziciriritse, kuko uru rwego arirwo rugaragaramo umubare munini w’Abanyafurika.
Abasaga 1000 bitariye iyi nama igamije kwigira hamwe uburyo habaho Umugabane w’Afurika urangwa n’Ubukungu binyuze mu gukora Ubucuruzi nyambukiranyamipaka butarimo amananiza.
Uretse ibi kandi, ni mu rwego rwo kungurana Ubumenyi mu bijyanye no guteza imbere abikorera ndetse n’abashora Imari mu guteza imbere abatuye uyu Mugabane.
Inzobere zigaragaza ko AfCFTA ari Uruhande rw’Ubucuruzi runini mu Isi, bicyo ko ruramutse rubyajwe Umusaruro binyuze mu kwishyira hamwe, guhangana ku Isoko ry’Umurimo, kwigiranaho mu Bukungu no gushora Imari nta mananiza, yatanga umusaruro ntakabuza.
N’ubwo Inzira ikiri ndende, Umuyobozi wungirije w’Umuryango w’Ibihugu by’Afurika yunze Ubumwe (AU), Umunyarwandakazi, Monique Nsanzabaganwa wari witabiriye iyi Nama ahagarariye Umuyobozi w”Umuryango w’Ibihugu by’Afurika yunze Ubumwe, Moussa Faki Mahamat, yabwiye abitabiriye iyi nama ko Afurika ifite amahirwe yo kuba Umugabane ukungahaye mu gihe washyira imbaraga mu gukorera hamwe.
Zimwe mu nkingi Eshanu (5) zagaragarijwe abitabiriye iyi nama mu rwego rwo gufasha uyu Mugabane gutera imbere, harimo;
- Abikorera basabwe guhaguruka bagaharanira ko amasezerano ya AfCFTA yashyirwa mu ngiro mu bihugu byabo
- Kudasigara inyuma kw’Igitsina gore mu ishyirwa mu bikorwa ry’aya masezerano
- Gufata ikerekezo gishya mu bijyanye n’ishyirwa mu bikorwa ry’aya masezerano
- Kuzamura umusaruro mbumbe w’Ibihugu 54 by’Afurika binyuze muri AfCFTA
- Gutanga amahirwe kandi angana mu Bucuruzi n’Ishoramari ku Mugabane w’Afurika.
