Ikipe ya The Great Warriors Karate Academy yegukanye irushanwa mpuzamahanga ry’umukino wa Karate “Zanshin Karate Championship” ryateguwe n’Ikipe ya Zanshin Karate Academy yo mu Karere ka Huye,
Iri rushanwa ryakinwe ku wa Gatandatu tariki ya 17 no ku Cyumweru tariki ya 18 Kanama 2024, ribera kuri Hotel Credo ku Karere ka Huye, ahazanzwe habarizwa iyi kipe.
Amakipe 16 arimo 11 yo mu Rwanda n’andi yo mu gihugu cya Kenya, yari yitabiriye iri rushanwa ryakinwaga ku nshuro yaryo ya kabiri.
Amakipe yo mu Rwanda yari agizwe na; APR Karate-Do, Flying Eagle Karate Club, Hero Karate Club Rafiki, Mamaru Karate Club, Rwanda Police Karate Club, Shito Ryu Karate-Do, The Champions Sports Academy, The Great Warriors Karate Academy, Yamabushi Karate – Do, Zanshin Karate Academy na Zen Karate-Do.
Uretse aya makipe yo mu Rwanda, amakipe yo mu gihugu cya Kenya yari agizwe na; Kanjuri Boys High School, Kenya Police College, Munawwarah Karate Club, Mukusho Karate Club na TAKK Kenya Orphanage.
Abakinnyi 91 barimo abagabo 75 n’abagore 16 bari bitabiriye iri rushanwa, bahatanye mu byiciro bibiri, birimo Kata (Kwiyereka) na Kumite (Kurwana).
Ikipe ya The Great Warriors Karate Academy yaryegukanye nyuma yo gukusanya Imidali 7 irimo 5 ya Zahabu n’indi 2 ya Silver.
Yakurikiwe na The Champions Sports Academy yakusanyije Imidali 11, irimo 2 ya Zahabu, 4 na Silver n’indi 5 ya Bronze.
Umwanya wa gatatu wegukanywe n’Ikipe ya APR Karate-Do, ibikesha kwegukana Imidali 12, irimo 2 ya Zahabu, 3 ya Silver n’indi 7 ya Bronze.
Ku ruhande rw’ikipe ya Zanshin itegura iri rushanwa, yasoreje ku mwanya wa 6 n’Imidali 4, irimo 1 wa Silver n’indi 3 ya Bronze.
Amakipe yavuye mu gihugu cya Kenya, iyaje hafi ni Munawwarah Karate Club yabaye iya 5 n’Imidali 2, irimo 1 wa Zahabu n’undi wa Bronze.
- Uko abakinnyi barushanyijwe kwegukana Imidali muri Kata na Kumite
- Uko amakipe yarushanyijwe kwegukana Imidali muri Kata na Kumite
- Urutonde rusange rw’uko amakipe yakurikiranye
Ndutiye Shyaka Mike Roger, Umukinnyi w’Ikipe ya The Great Warriors Karate Academy, nyuma yo kwegukana iri rushanwa, mu kiganiro n’Itangazamakuru yagize ati:“Ikipe yacu ishimishijwe no kwegukana iri rushanwa, cyane ko twahigitse amakipe akomeye arimo n’ayo ku rwego mpuzamahanga. Tusahimira abatoza bagize uruhare mu myiteguro kandi turabizeza ko urugendo rutarangiye, ahubwo tugiye gukomerezaho tukazegukana n’andi marushanwa yo mu bihe biri imbere”.
Abakinnyi batandukanye kandi banyuze n’uko bitwaye, by’umwihariko mu kiciro cy’abagore.
Ku ruhande rw’Ikipe ya APR Karate-Do yahise izindi mu kiciro cy’abagore, Uwase Razia, uri mu bakinnyi iyi kipe igenderaho muri Kumite, akomoza kuri iri rushanwa n’umusaruro Ikipe ye ikuyemo, yagize ati:“Guhiga izindi kipe byadushimishije, by’umwihariko twarabikoreye kuva ku munsi wa mbere. Ibanga ryaduhesheje iyi ntsinzi n’uguhozaho ndetse no kudacika intege. twifuzaga gutwara ibikombe byose, ariko ntabwo byakunze. Tugiye gukora ibishoboka, dukaze imyitozo, ku buryo umwaka utaha nta gikombe kizaduca mu rihumye”.
Umuyobozi wa Zanshin Sport Solutions, Sensei Mwizerwa Dieudonne usanzwe unakurikiye Ikipe ya Zanshin Karate Academy yateguye iri rushanwa, yagize ati:“Twanyuzwe n’uburyo iri rushanwa ryagenze, cyane ko ibyo twateganyaga turitegura byagezweho”.
“Ku ruhande rw’abakinnyi, bagaragaje urwego ruri hejuru haba mu kiciro cy’abagabo n’abagore kandi muri Sitire (Style) zose Kata na Kumite”.
“Turishimira ko ku nshuro ya mbere mu Rwanda hakoreshejwe uburyo bwa (VAR) yafashije abasifuzi mu gutanga ubutabera bunoze ku bakinnyi, cyane mu gihe abatoza batari banyuzwe n’imisifurire yahawe abakinnyi babo”.
Nyuma y’iri rushanwa ry’abakuru, ku wa Gatandatu no ku Cyumweru, hateganyijwe irushanwa ry’abakiri bato (Munsi y’Imyaka 15), aho biteganyijwe ko abakabakaba 300 bazaryitabira.
Iri rizaba rikinwe ku nshuro ya kabiri, mu gihe iri ry’abakuru ari ubwa mbere ryari rikinwe.
Sensei Mwizerwa yaboneyeho umwanya wo gushimira by’umwihariko Abafatanyabikorwa bagize uruhare mu gutegura iyi mikino barimo; MARTIN HARDWARE & TWYFORD RWANDA na HIGHENDS Tours & Travel Agency n’abandi..
Amafoto
