Jeannine Mukandayisenga uzwi nka “KaBoy” usanzwe ukinira ikipe ya Rayon Sports y’abagore, agiye gukora igeragezwa mu ikipe ya Yanga y’abagore, izwi nka Yanga Princess.
Yanga Princess ikina shampiyona y’abagore muri Tanzaniya, yatangaje ko yashimye uko uyu mukinnyi yitwara, bityo ko iri mu nzira zo kuvugana na Rayon Sports ngo imwibikeho.
Mukandayisenga umaze iminsi muri Tanzaniya ageragezwa, ari gukoza imitwe y’intoki ku masezerano ashobora gutuma akinira imwe mu makipe y’ibigugu mu Karere mu mupira w’amaguru w’abagore.
Mu kiganiro yahaye Ikinyamakuru The Newtimes, Umunyamabanga w’ikipe ya Rayon Sports y’abagore, Bennie Kana Axella, yahamije iby’aya makuru.
Ati:“Nibyo, Umukinnyi wacu (Jeannine Mukandayisenga), yagiye mu igeragezwa muri Yanga Princess, ariko nta busabe bwo kumugura turakira mu buryo bwemewe n’amategeko”.
Amakuru y’igurwa rya Jeannine Mukandayisenga, avuga ko Yanga yifuza kumutangaho 3,000$, aya akaba ari 4,126,842 mu mafaranga y’u Rwanda.
Gusa, biravugwa ko n’ubwo Yanga ishaka kumutangaho 3,000$, ikipe ya Rayon Sports imwifuzaho 5,000$, aya akaba ari 6,878,070 mu manyarwanda, ugereranyije n’uko Idorali ry’Amerika rihagaze ku isoko ry’imbere mu gihugu.
Mukandayisenga uzwi nka “KaBoy”, n’umwe mu bakinnyi bayoboje Inkoni y’Icyuma ruhago y’abagore mu Rwanda.
Igihamya ubu buhangange bwe, n’uko amaze gutsinda ibitego 13 mu mikino 7 gusa amaze gukina ya Shampiyona.
Yinjiye mu ikipe ya Rayon Sports mu mwaka w’imikino 2023-24, avuye mu ikipe ya Inyemera yo mu Karere ka Gicumbi ho mu Ntara y’Amajyaruguru y’Igihugu.
Yafashije Rayon Sports kwegukana igikombe cya Shampiyona y’i 2023-24 n’icy’Amahoro byombi muri uyu Mwaka w’imikino.
Mukandayisenga yarangije iyi Shampiyona ariwe mukinnyi watsinze ibitego byinshi kurusha abandi.