Mugisha Bonheur ukina hagati mu Kibuga mu Ikipe y’Ingabo z’u Rwanda, APR FC ategerejwe muri Shampiyona ya Tuniziya mu ikipe ya Stade Tunisien.
Iyi yipe yatangaje ko ategerejwe muri iki Cyumweru tugiye kwerekezamo ngo akore Ibizamini by’Ubuzima, mu gihe amasezerano afitanye na APR FC arangira kuri uyu wa 30 Kamena 2023.
Uyu mukinyi w’Imyaka 23 y’amavuko kuri ubu, yohererejwe urupapuro rumutumira muri iyi kipe na Perezida wayo, Mohammed Mahjoub tariki ya 26 Kamena 2023.
Mu gihe yaramuka atsinze iki Kizamini cy’Ubuzima, azahita asinya muri Stade Tunisien amasezerano y’Imyaka ibiri (2).
Mugisha ni umwe mu bakinnyi banyuze mu Ishuri ry’Umupira w’amaguru rya Heroes ribarizwa i Mayange mu Karere ka Bugesera mu Ntara y’Uburasirazuba bw’u Rwanda.
Ku myaka 15, yashimwe n’abatoza b’iri Shuri rya Ruhago, nyuma y’Imyaka 2 gusa aryerekejemo ashyira mu ikipe yaryo ya mbere.
Mu Mwaka w’i 2019, ubwo yakinaga ku nshuro ye ya mbere ikiciro cya kabiri cya Shampiyona y’u Rwanda ari hamwe n’iyi kipe ya Heroes, yayifashije gusoreza ku mwanya wa kane (4) mu itsinda.
Mu Mwaka wa Shampiyona wakurikiyeho, yazamukanye na Heroes mu kiciro cya mbere cya Shampiyona y’u Rwanda (Primus National League).
Heroes ntabwo yatinze muri Shampiyona, kuko yahise isubira mu kiciro cya kabiri, gusa, Mugisha ntabwo yamanukanye nayo kuko yahise asinyishwa n’ikipe ya Mukura VS&L nk’umukinnyi w’umutirano.
Yakinnye muri Mukura VS&L umwaka umwe gusa, bitewe n’urwego rwo hejuru yayigaragarijemo, abengukwa na APR FC ihita imusinyisha amasezerano y’Imyaka ibiri (2).
Yafashije APR FC kwegukana ibikombe bya Shampiyona bibiri (2), no kugera ku mukino wa nyuma w’Igikombe cy’Amahoro (2023), gusa ntabwo yakengukanye kuko yatsinzwe na Rayon Sports igitego 1-0 ku mukino wa nyuma wabereye kuri Sitade Mpuzamahanga ya Huye.