Urubanza rwa Miss Nshuti Muheto Divine rwatangiye kuri uyu wa Kane, aho yunganiwe n’abanyamategeko batatu.
Iburanisha ryabereye mu Rukiko rw’Ibanze rwa Kicukiro.
Miss Muheto Divine yabajijwe niba yemera ibyaha byose aregwa, yemera ko yagonze ariko ko atigeze ahunga nyuma yo kugonga.
Ubushinjacyaha bwagaragaje ko Miss Muheto wari wanywereye mu kabari ka Atelier du Vin, saa Sita z’ijoro yafashe imodoka ye ataha aho atuye Kicukiro.
Ubushinjacyaha bwavuze ko kubera ubumenyi buke mu gutwara Imodoka no kuba yanyweye ibisindisha ku rwego rwo hejuru byatumye agonga ipoto y’amashanyarazi n’umukindo.
Bwavuze ko nyuma yo kugonga yaje guhunga, abaturage baramuhururiza ariko nyuma yaje kugaruka aje kujyana telefoni ze, asanga polisi yahageze akajya avuga ko atari we wari utwaye icyo kinyabiziga.
Bwavuze ko atari ubwa mbere ibyo bikorwa abikoze ahubwo ko no Ku wa 23 Nzeri 2024 yari yagiriwe inama ndetse anasaba imbabazi.
Bwasabye ko Urukiko rwamuhamya ibyaha bitatu akurikiranyweho.
Ubwo yari ahawe umwanya ngo avuge ku byo aregwa, Miss Muheto yavuze ko “Nemera gutwara nasinze, gutwara nta ruhushya no kugonga ariko sinemera guhunga.”
Yavuze ko yagiye ku ruhande kuko nyuma yo kugonga yabonye abantu benshi bahuruye bikaba ngombwa ko yegera ku ruhande, ariko ko atigeze ahunga ngo kuko yari aho hafi ku buryo na polisi yahageze na we ayitegereje.
Umwe mu banyamategeko ba Miss Muheto Divine yavuze ko umukiliya we yemera ibyaha ndetse akanabisabira imbabazi kandi ko atigeze arushya inzego z’ubutabera.
Yavuze ko yari afite uruhushya rw’agateganyo rwo gutwara ibinyabiziga, bityo ko amategeko y’umuhanda yari ayazi ariko ko yakoze ikosa ryo gutwara imodoka wenyine adafite uruhushya rwa burundu.
Miss Muheto Divine yatakambiye Urukiko, asaba ko yagabanyirizwa ibihano yasabiwe n’Ubushinjacyaha.
Ati “Mu minsi maze mfunzwe nabashije kwiga, kandi ibyaha ndegwa nkaba mbisabira imbabazi nanizeza urukiko aho mpagaze imbere yarwo bitazongera ukundi.”
Ubushinjacyaha bwasabye Urukiko gushingira ku bimenyetso, rukemeza ko ibyaha byo gutwara imodoka yasinze, gutwara adafite uruhushya no guhunga umaze gukora cyangwa guteza impanuka Miss Muheto Divine akurikinyweho bimuhama.
Bwamusabiye guhanishwa igifungo cy’umwaka umwe n’amezi umunani n’ihazabu y’ibihumbi 220Frw.