Uburusiya bwarashe urufaya rwa misile mu mijyi itandukanye muri Ukraine. Zahitanye abantu 29, zisenya n’ibitaro by’abana mu murwa mukuru Kiev.
Perezida Volodymyr Zelenskyy yatangaje ko misile zirenga 40, uretse abo zishe, zakomerekeje n’abandi barenga 50. Yongeraho ko zashenye ibikorwa remezo, amasoko n’amangazini by’ubucuruzi, inganda, n’ingo z’abaturage.
Meya wa Kiev, Vitali Klitschko, we yatangaje ko ari ubwa mbere kuva mu kwa kabiri 2022 Uburusiya burashe misile nyinshi gutya mu mujyi ayobora. Zimwe muri izo misile zashenye igice kimwe cy’ibitaro bya mbere binini by’abana muri uwo mujyi. Hapfuye abantu bane, abandi batatu barahakomerekera.
Ubufaransa bwamaganye bwivuye inyuma uku kurasa ibitaro by’abana. Buvuga ko ari “igitero cya kinyamaswa gishobora kongerwa ku bindi byaha by’intambara Uburusiya bugomba kuryozwa.”
Minisitiri mushya w’ububanyi n’amahanga w’Ubwongereza, David Lammy, nawe yaryunzemo, ati: “Tugomba gukurikirana abo ari bo bose bafite uruhare muri iyi ntambara ya Putin ihonyora amategeko.” (AP, Reuters, AFP)
