Kuri uyu wa Gatandatu tariki ya 19 Kanama 2023, ikipe y’Ingabo z’u Rwanda, APR FC, iracakirana na Gaadidka FC yo muri Somalia mu mukino ubanza w’ijonjora ry’ibanze rya CAF Champions League.
Uyu mukino uza kubera kuri Sitade yitiriwe Pele i Nyamirambo mu Mujyi wa Kigali, urahuza impande zombi zizishakamo ikipe imwe izahura na Pyramid FC yo mu Misiri mu ijonjora rikurikiraho.
Mu kwitegura uyu mukino, APR FC yakinnye imikino itandukanye, irimo uwo yatsinzemo Marine FC ibitego 3-1 byose byatsinzwe na rutahizamu Victor Mbaoma.
Gusa, yatsinzwe na mukeba w’ibihe byose, Rayon Sports FC ibitego 3-0 mu mukino w’igikombe kiruta ibindi (Super Cup).
Nyuma yo gutsindwa uyu mukino, Umutoza Thierry Froger yasabye abakinnyi kuguma mu mwuka mwiza no kudacikamo igikuba mu gihe bitegura uyu mukino uvuze byinshi ku mwaka w’imikino by’umwihariko ku ruhando mpuzamahanga.
Kugeza ubu, APR FC igiye gukina uyu mukino, abakunzi bayo ndetse n’umutoza bagishidikanya ku bushongore n’ubukaka bw’abakinnyi basatira izamu.
Gusa ariko, kuri iyi nshuro, hahanzwe amaso abakinnyi babiri barimo Apam Assongwe na Victor Mbaoma.
Ingingimira zikaba zituruka ku kuba mu mikino ibiri iheruka, iminota 180 yayo yashize nta numwe unyeganyeje izamu.
N’ubwo ba rutahizamu bashidikanywaho, abakunzi b’iyi kipe bizeye abakinnyi bo hagati mu kibuba barimo Umunyasudani, Sharaf Shaiboub n’Umurundi, Ismail Nshimirimana uzwi ku izina rya Pitchou.
Nyuma yo kugera mu Rwanda kuri uyu wa Gatanu mu masaha ya mugitondo, ku mugoroba Gaadidka FC yaraye ikoreye imyitozo kuri Sitade yitiriwe Pele ari nayo iza kwakira uyu mukino.
Umwe mu bakinnyi bo guhangwa amaso muri no kwitondera muri iyi kipe, ni rutahizamu w’imyaka 25 ukomoka muri Nijeriya, Pentecost Obiechina.
Uyu mukinnyi usatira izamu anyuze ku ruhande, yakinnye muri za Shampiyona zitandukanye zirimo iya Slovakia na Repubulika ya Czech.
Ku rupapo, APR FC irahabwa amahirwe, gusa iminota 90 y’umukino iba ihishe byinshi, APR FC irasabwa kwitonda kuko iyi kipe yo ku murwa mukuru wa Somalia, Mogadishu ishobora kuyikora mu jisho.
