Ku wa Kabiri w’iki Cyumweru tariki ya 25 Nyakanga 2023, Impuzamashyirahamwe ya ruhago ku mugabane w’Afurika (CAF) yakoze tombola y’amarushanwa itegurira amakipe (Clubs), iyi ikaba yarakozwe ku makipe azitabira Champions League na Confederations Cup.
Iyi tombola yasize ikipe y’Ingabo z’u Rwanda, APR FC itomboranye na Gaadiidka FC yegukanye Shampiyona yo muri Somalia.
Umukino ubanza hagati y’aya makipe yombi uzabera mu Rwanda tariki ya 19 Kanama (8), mu gihe uwo kwishyura uzakinirwa mu Mujyi wa Banadir i Mogadishu tariki ya 25 Kanama (8) 2023.
Ni ubwo Gaadiidka FC ari ikipe itari nto mu zibarizwa muri Afurika y’i Burasirazuba, abakunzi ba ruhago mu Rwanda bayifashe nk’iciriritse imbere ya APR FC ndetse batangira kwibaza ingano y’ibitego izatsindwa.
Muri iyi nkuru, THEUPDATE yabateguriye ibigwi n’ibirindiro bya Gaadiidka FC.
Aha, turibanda ku mateka yayo kuva yashingwa, umusaruro yagize, uburyo ikinamo, abakinnyi b’inkingi za mwamba n’ibindi…
- Amateka
Gaadiidka FC, yabanje kwitwa AutoParco, ni ikipe ibarizwa muri Shampiyona y’ikiciro cya mbere muri Somalia, ikaba ibarizwa mu Mujyi wa Banadir ku Murwa mukuru wa Somalia Mogadishu.
Ni ikipe y’ikigo cy’Igihugu cya Somalia gishinzwe ubwikorezi. Ntago ari ikipe nto na gato, kuko yashinzwe mu mwaka w’i 1942.
Igitekerezo nyamukuru cyo kuyishinga, kwari ugufasha no guhanga imirimo ishingiye kuri siporo mu bakozi bakora mu bigo bitandukanye.
Umukino w’umupira w’amaguru ntago ari mushya muri Somalia, kuko watangiye kuhakinirwa mu gihe cy’Ubukoloni guhera mu myaka y’i 1930, ubwo iki gihugu cyakoronizwaga n’Ubwongereza.
Gusa, icyo gihe nta Shyirahamwe rya ruhago ryahabaga, ahubwo amakipe yakinaga mu buryo bwo kwiyamiza no kunezeza abayareba.
Nyuma y’uko zihinduye imirishyo mu myaka y’i 1950, amakipe yatangiye gukina kinyamwuga, bityo AutoParco yaje guhindika Gaadiidka, itangira kwegukana Shampiyona, aho yabaye ikipe ya mbere ikoze agahigo ko kwegukana ibikombe 3 bya Shampiyona yikurikiranya 1954/55, 1955/56 n’i 1956/57.
Nyuma y’uko ikoze aya mateka, mu mwaka w’i 1958, Igihugu cyatangiye gutegura Shampiyona, icyo gihe yegukanwa na Bondere FC, yabaye ikipe ya mbere itwaye igikombe kizwi na Leta, kuko mbere Somalia yarebererwaga n’Umuryango w’Abibumbye.
Somalia imaze kubona ubwigenge mu 1961, AutoParco yaje kuba Gaadiidka FC, amakipe yatangiye kuyibonera, ubuhangange bwayo bwegukanwa n’amakipe arimo ‘Lavori Publici na Horseed FC ‘.
Guhera mu 1961 kugeza mu 1990 ntago iyi kipe yorohewe n’ikibazo cy’ubukungu, kuko cyayishegeshe n’umusaruro urakendera.
Gusa, nyuma y’uko abaherwe bongeye kuyimenamo agafaranga, yeguye Umutwe, ndetse inatwara igikombe cya Shampiyona yaherukaga mu myaka 33.
Nyuma yo kwegukana iki gikombe, ntago yongeye guhozaho, kuko yakomeje guhura n’ibizazane, byatumye imara indi myaka nta gikombe, kuko yongeye kwegukana igikombe mu mwaka w’i 2020/21.
- Gaadiidka FC mu mwaka w’imikino 2022/23
Imaze gutwara igikombe cyo mu 2020/21, mu mwaka w’i 2022/23 yongeye ku kegukana, yongera kwigarurira ikuzo.
Mu mikino yo kwishyura, yigaranzuye Heegan FC yari yitwaye neza mu mikino ibanza ya shampiyona.
Mu mikino 16 yakinnye, Gaadiidka FC yatsinzemo 10, itsindwa 4 inganya 2.
Umukino ufatwa nk’udasanzwe yakinnye, ni uwayihyje na Jazeera tariki ya 28 Ukwakira 2022, uyu ukaba wararangiye iyinyagiye ibitego 4-0.
- Sitade ikiniraho
Sitade Garoonka Banaadir iri i Mogadishu ku Murwa mukuru wa Somalia, ni imwe mu zikunze kuyihira ndetse amakipe ihakirira ntajya arusimbuka.
Iyi Sitade yakira abantu 10,000 iyo uri kuhakinira haba hameze nk’ukuzimu kubera uburyo abafana baba bagucanaho umuriro.
- Umukinnyi ngenderwaho (Pentecost Obiechina)
Tariki ya 01 Nyakanga 2022, nibwo Gaadiidka FC yaguye uyu Munyanijeriya ukina anyura ku ruhande.
Kugeza ubu, afatwa nk’umwe mu bakinnyi beza baranze amateka ya Shampiyona muri Somalia.
Ku myaka 25 y’amavuko, Obiechina mbere yo kwerekeza muri Somalia, yabanje gukina imyaka 5 ku Mugabane w’Uburayi mu Bihugu bya Czech na Slovakia.
Yanyuze kandi mu makipe arimo ‘Senica FC’, iyi ikaba ifatwe nk’imwe mu zikomeye muri shampiyona ya Slovakia.
Ukunyaruka kwe anyura ku ruhande, ni umwe mu bakinnyi bateza ibibazo mukeba mu gihe icyo aricyo cyose cy’umukino.
- Uruhande rukomeye
Impande za Gaadiidka FC ni hamwe mu hantu yizera kandi hakunze kuyiha umusaruro. Ibi ibikesha ko kuba inshuro nyinshi ibitego itsinda bituruka kuri aba ba mababa.
- Aho yoroshye
Gaadiidka FC, ni umwe mu makipe yinjizwa ibitego n’ubwo nayo ibitsinda.
Mu mikino 16 yakinnye muri Shampiyona y’i 2022/23, yatsinzwemo ibitego 15, bivuze ko byibuze hafi kuri buri mukino itsindwa igitego. Gusa, nayo yatsinze ibitego 28, hafi 2 kuri buri mukino.
- Uburyo ikinamo
Gaadiidka FC, inshuro nyinshi ishaka ibitego inyuze ku ruhande. Ikunze gukinisha uburyo bwo guhagarika abakinnyi mu kibuga bwa 4-4-2, aho umukinnyi unyura kuri 7 na 11 baba bakanganye kandi bihuta cyane.
Buri kanya baba batera impira inyuranamo, ku buryo ba myugariro ba mukeba batayirinze kuhikura byagorana.