Mu gihugu cy’Uburundi haravugwa inkuru y’incamugogo, nyuma y’urupfu rwa Florence Sifa Kalume wari umukinnyi wa Basketball na Football muri Leta zunze ubumwe za Amerika (USA).
Florence Sifa Kalume wari uzwi ku kazina ka Dada, yari Umurundikazi wari ukunzwe haba mu gihugu cye no mu Rwanda.
Uyu wari waramenyekenye nk’umwe mu bakobwa b’abahanga mu mukino wa Basketball na Football, yaguye mu mpanuka y’akazi yabereye muri Amerika.
Dada yitabye Imana afite imyaka 32 y’amavuko, yavukiye mu Mujyi wa Bujumbura umurwa mukuru w’u Burundi. Yatangiye gukina Basketball muri 2004, ayinjijwemo n’inshuti ye.
Agaruka ku rupfu rwe, Valery Manirakiza, umuyobozi w’ikipe ya Gradiators yahoze yitwa Berco, yavuze ko ikipe ye yababajwe n’urupfu rwa Dada.
Mu butumwa bugufi yoherereje Ikinyamakuru cy’Abongereza BBC, yatangaje ko Dada yari umwe mu bigeme (abakobwa) b’abakinnyi bakomeye cyane Uburundi bwagize.
Yavuze ko Frolence Sifa yahitanywe n’impanuka yo mu kazi (isanganya) mu Gifaransa bakunze kwita ‘Traumatisme Cranien’ muri Leta zunze ubumwe za Amerika aho yari atuye.
Ati:”Tubuze umwana wacu, Imana imwakire mu bayo. Abakunzi ba Basketball mu Karere bari bamuzi cyane nk’umukobwa muto wirabura, wakundaga guseka cyane mu gihe yabaga ari mu kibuga akina”.
Yabaye Meneuse cyane cyane mu ikipe ya Berco Stars n’ikipe y’Igihugu y’Uburundi Intamba mu rugamba.
Yari afite ubuhanga cyane mu gutanga umupira (Pass) ubu buhanga bwe bukaba bwaramugejeje muri Amerika.
Yatangiye kugaragaza ubuhanga ubwo yigaga mu Mashuri abanza akiri muto.
Nyuma nibwo yaje gukomereza mu gihugu cya Uganda aho yigaga mu ishuri ry’umupira w’amaguru rya Crane High School.
Nyuma y’uko abakuru biri Shuri bari barakunze ubuhanga bwe yagaragaje mu mikino y’amarushanwa mu mashuri yisumbuye mu Karere, nibwo baje kumusaba kuba yajya gukinira iri Shuri, yamaze yo umwaka umwe asubira mu Burundi.
Igihe yakiniraga mu Karere yabaye umukinnyi uhiga abandi ‘Most Valuable Player (MVP) mu irushanwa ry’u Burundi, MVP mu Karere ka gatanu inshuro ebyiri n’inshuro imwe muri Uganda 2007.
Imyaka myinshi yayimaze muri Berco Stars y’i Bujumbura mu gihugu cy’Uburundi mbere y’uko 2016 yerekeza gukina i Dallas, Texas na Jacksonville muri Amerika.
Muri 2018, yageze mu ikipe y’abagore ya Bearcats ya Kaminuza ya Cincinnati avuye muri Jacksonville College, aho nibura yatsindanaga amanota 17 ku mukino.
Yakiniye Bearcats imyaka itatu mbere y’uko aburirwa irengero mu bakinnyi b’iyi Kaminuza.
Kuri ubu akaba nta kipe izwi yakiniragamo.
Uretse ayo makipe yamenyekanyemo, Dada yanakiniye ikipe yitwa La Colombe.
Valery Manirakiza umukuru w’ikipe Gradiators, yabwiye BBC ko iguhe cyo kumushyingura kitaramenyekana, ndetse hatarafatwa umwanzuro niba azashyingurwa muri USA cyangwa mu Burundi.
