Tariki ya 07 Ukoboza 2024, Ikipe ya Rayon Sports yakiriye APR FC mu mukino w’ikirarane cy’umunsi wa gatatu wa Shampiyona utarakiniwe igihe.
Uyu mukino wakiniwe kuri Sitade Amahoro i Remera, warangiye amakipe yombi aguye miswi y’ubusa ku busa.
Sitade Amahoro ivuguruye ikavanwa ku kwakira abafana 25.000 igashyirwa ku bushobozi bwo kwakira 45.000, yari yakiriye ku nshuro ya mbere uyu mukino wa Shampiyona.
Abafana n’iyonka bari babucyereye, ku buryo guhera saa 02:00 z’Igicuku gishyira ku wa Gatandatu, abafana bari batangiye kwerekeza i Remera.
Ku ruhande rw’abafana, batashye batanyuzwe kuko buri mufana yifuzaga ko ikipe yari ashyigikiye yakwegukana intsinzi, gusa ku ruhande rw’abatoza bo batangaje ko banyuzwe n’uko umukino warangiye, n’ubwo intsinzi ntawe yari kugwa nabi.
Ku ruhande rwa APR FC, Umunya-Serbia, Darko Novic yavuze ko yari yizeye abakinnyi be, kandi yanyuzwe n’umusaruro yabonye.
Yakomeje avuga ko bagize amahirwe macye yo kwegukana umukino, kuko mu kibuga uko bakinaga byarashobokaga.
Ati:“Inota rimwe ntacyo ritwaye. Kuba Rayon Sports iturusha amanota menshi ntabwo binteye umutima uhagaze, kuko nzi ko abakinnyi banjye bakomeye kandi bazayakuramo igihe icyo aricyo cyose”.
Yunzemo ati:“Ndashimira abakinnyi banjye uburyo bitwaye. Amahirwe ntabwo yadusekeye, ariko ntacyo mbashinja. Mukeba tumaze guhura nawe, amakipe dusigaje mbere yo gusoza imikino ibanza, nayabwira ngo nakenyere akomeze kuko turaje”.
Ku ruhande rwa Rayon Sports, Umutoza w’Umunya-Brazil, Robertinho yatangarije itangazamakuru nyuma y’umukino ko inota yakuye kuri APR FC ryamunyuze.
Yavuze ko kuri ubu afite amanota 30, akaba arusha AS Kigali imukurikiye amanota 7. AS Kigali yagize amanota 23 nyuma yo gutsinda Bugesera FC ibitego 2-1 mu mukino w’umunsi wa 12 wakinywe ku wa Gatandatu.
Robertinho yagize ati:“Twifuzaga amanota yose, ariko na rimwe twabonye twaryishimiye. Deribi (Derby) ikivuyemo cyose kitari ugutsindwa, dukwiriye kukishimira”.
“Nanyuzwe n’uko abakinnyi banjye bitwaye. Iyi ni Deribi (Derby), byanze bikunze umukino uba ari indyankurye. Abafana ntabwo bakwiriye gukerensa mukeba (APR FC), n’ikipe ikomeye duhanganiye Igikombe cya Shampiyona”.
“Ikingenzi, abafana bishimire ko ikipe yacu ikiyoboye Shampiyona. Ntabwo ikipe yacu iratsindwa kuva natangira kuyitoza, kandi tuzabikomeza”.
Akomoza ku buryo bw’imikinire yifashishije muri uyu mukino, butandukanye na 4-3-3 asanganywe, yavuze ko byatewe n’uko yashakaga kudaha icyuho mukeba, kandi ko guhagarika abakinnyi mu kibuga bitandukanira ku bukomere bw’imikino.
Tariki ya 14 Ukuboza 2024, Rayon Sports izagaruka mu kibuga icakirana na AS Kigali iyikurikiye, mu gihe APR FC izakira Kiyovu Sports tariki ya 11 Ukuboza 2024, mu mikino yombi izakinirwa kuri Sitade yitiriwe Pelé i Nyamirambo mu Mujyi wa Kigali.
Amafoto
