Ambasade zirimo z’Ibihugu bitandukanye birimo u Rwanda, Uganda, Ubufaransa, Ubuyapani, Ububiligi na Leta zunze Ubumwe z’Amerika (USA), zagabaweho ibitero n’abari mu myigaragambyo i Kinshasa ku murwa mukuru wa DR – Congo, mu rwego rwo kugaragaza akababaro batewe n’Intambara iri kubera mu Burasirazuba bw’iki gihugu by’umwihariko mu Mujyi wa Goma, uhana imbibi n’uwa Rubavu (Gisenyi).
Amashusho yafatiwe muri iyi myigaragambyo, yerekana zimwe mu nyubako ziri gusahurwa.
Minisitiri w’Ububanyi n’Amahanga w’Ubufaransa, Jean-Noel Barrot, yatangaje ko igice kimwe cy’Ambasade yabo cyatwitswe.
Mu butumwa kuri X (yahoze ari Twitter), yagize ati:“Ibi bitaro ntabwo ari ibyo kwihanganirwa. Abigaragambyaga bari bakongeje inyubako, ariko yazimijwe”.
Yakomeje agira ati:“Turi gukora ibishoboka byose, ngo abakozi b’Ambasade yacu, bacungirwe umutekano uko bikwiye”.
Polisi ya DR – Congo yahise itatanya aba bigaragambyaga ikoresheje imyuka iryana mu maso. Gusa, bavugaga ko bamagana Umutwe witwaje Intwaro wa M23.
Umuvugizi wa DR – Congo, Patrick Muyaya, yavuze ko bashimira abaturage babo berekanye ko bashyigikiye Ingabo z’iki gihugu, zihanganye na M23 mu rugamba karahabutaka.
Akomoza ku kigiye gukorwa nyuma y’uko izi Ambasade zitewe, Patrick Muyaya yavuze ko Umutekano wakajijwe, kandi Polisi yamaze gushyira ibintu ku murongo.
Ku ruhande rw’Ubuyapani, Ambasade yasabye Abayapani bose kuguma mu Mazu yabo, no kwirinda kujya ku biro by’Ambasade, kugeza igihe bazahererwa andi mabwiriza mashya.
I Kinshasa ku murwa wa DR – Congo, bimwe mu bice by’uyu Mujyi bimeze nk’ibitarimo abantu, mu gihe Amashuri n’Amaduka bifunze.
Ejo hashize, Imiryango itegamiye kuri Leta, yasabye abaturage kuguma mu Mazu ibizwi nka (Ville Morte), nk’ikimenyetso cyo kwifatanya n’Ingabo za Leta zihanganye na M23 mu Mujyi wa Goma.
- Umutwe wa M23 watangaje ko wigaruriye Ikibuga cy’Indege cya Goma
Kugeza ubu, M23 iracyahanganye n’Ingabo za Leta n’abazifasha, gusa uyu Mutwe urakoze imitwe y’intoki ku ntsinzi yeruye.
Umuryango w’Ababimbye (ONU), watangaje ko Imirambo y’abapfuye yuzuye mu Mihanda kandi hari ‘abagore n’abakobwa’ bafashwe ku ngufu n’impande zirwana.
Nyuma y’uko M23 itangaje ko igiye kubaga ibitero ku Mujyi wa Goma, Imiryango mpuzamahanga yatangaje ko bizakurura akaga, ndetse bizasiga iheruheru abatari bacye, cyane ko uyu Mujyi utuwe na Miliyoni zirenga ebyiri.
Guhera mu Mwaka ushize, abasaga 400,000 bakuwe mu byabo n’iyi ntambara nk’uko Ishami rishinzwe Impunzi (UNHCR), ribivuga.
- Afrika y’Epfo yatanagaje ko yapfusshije Abasikare bane
Igihugu cy’Afurika y’Epfo, cyatangaje ko abasirikare bacyo bane, baguye ku rugamba bari gufashamo DR – Congo ihanganyemo na M23.
Kugeza ubu, Afurika y’Epfo imaze kuburira muri iyi ntambara, abasirikare 13.
Muri aba bane, batatu muri bo, baguye mu ntambara yo ku Kibuga cy’Indege cya Goma, mu gihe undi yahitanywe n’ibikomere yakuye mu mirwamo yo ku wa kane w’Icyumweru gishize.
- Intambwe y’Amahoro
Ibiro bya Perezida w’Afurika y’Epfo, Cyril Ramaphoza, byatangaje ko ejo ku wa Mbere, uyu mukuru w’Igihugu yavuganye na mugenzi we w’u Rwanda, Kagame Paul, ku buryo ibintu bihagaze muri iyi ntambara, no gusubukura ibiganiro by’amahoro.
Kuri uyu wa kabiri, Umuryango w’Afurika yunze ubumwe (UA), watangaje ko haza gukorwa inama y’igitaraganya, igamije kureba uko ibintu bihagaze.
Ejo hashize, Perezida wa DR – Congo, Felix Tshisekedi, yakoranye inama n’abayobozi mu nzego zitandukanye, mu rwego rwo kureba uko ibintu bimeze.
Mu kiganiro kuri Telefone na Perezida Felix Tshisekedi, Minisitiri w’Ububanyi n’Amahanga wa USA, Marco Rubio, yatangaje ko yamaganye ibitero by’Umutwe wa M23 ku Mujyi wa Goma.
Marco Rubio yatangaje ko yavuganye na Perezida wa Kenya, William Ruto, amwerera gukora ibishoboka byose ngo haboneke agahenge binyuze mu biganiro.
Muri uwo mujyo, kuri uyu wa Gatatu, hateganyijwe Inama y’abakuru b’Ibihugu byo mu Muryango w’Afurika y’i Burasirazuba (EAC) iza kubera muri Tanzaniya, gusa Perezida Felix Tshisekedi, yavuze ko ataza kuyitabira.