Impuzamashyirahamwe y’umupira w’amaguru muri Afurika y’i Burasirazuba no hagati, CECAFA, yatangaje igihe iri rushanwa ritegurwa inkunga na Perezida Kagame Paul, rizakinirwa muri uyu Mwaka.
Ingengabihe igaragaza ko irushanwa ry’uyu Mwaka rizakinwa hagati ya tariki ya 31 Kamana n’iya 14 Nzeri 2025.
Umwanzuro w’igihe iri rushanwa rizakinirwa, watangarijwe mu nteko rusange ya CECAFA, yabereye muri Sudani y’Epfo, mu mpera z’iki Cyumweru.
Ubuyobozi bwa CECAFA, bwatangaje ko ibihugu byose binyamuryango uko ari 12, bihawe ikaze ryo gupiganirwa kwakira iri rushanwa.
Ibihugu 12 bigize CECAFA, ni; U Rwanda, Uganda, Tanzania, Burundi, Kenya, Eritrea,
Somalia, Djibouti, Ethiopia, South Sudan, Sudan na Zanzibar.
Mu Mwaka ushize (2024), iri rushanwa ryakiniwe mu gihugu cya Tanzaniya. Ryegukanywe n’Ikipe ya Red Arrows yo muri Zambiya, itsinze APR FC yo mu Rwanda, kuri Penaliti.
Iri rushanwa ryatangiye gukinwa mu 1974, ryitabirwa n’amakipe yegukanye ibikombe mu bihugu byayo.
Mu 2002, nibwo ryatangiye kwitirirwa Perezida wa Repubulika y’u Rwanda, nyuma yo kuritera inkunga.
Perezida Kagame atanga inkunga y’Ibihumbi 60$, bigabanwa n’amakipe atatu. Iya mbere yegukana ibihumbi 30$, iya kabiri ihabwa 20$, mu gihe iya gatatu yegukana 10$.
Ikipe ya Simba SC yo muri Tanzaniya, niyo imaze kwegukana iri rushanwa inshuro nyinshi, esheshatu.