Minisitiri wa Siporo mu Rwanda, Nyirishema Richard, yakurikiranye Umukino w’Umunsi wa gatandatu wa Shampiyona y’ikiciro cya mbere wahuje Ikipe y’Ingabo z’u Rwanda, APR HC n’iya Police, Police HC.
Uretse Minisitiri Nyirishema, uyu mukino wakurikiranywe n’Umuyobozi wungirije wa Polisi y’u Rwanda, DCG Jeanne Chantal Ujeneza n’umuyobozi w’Ishyirahamwe ry’Umukino wa Handball mu Rwanda (Ferwahand), Twahirwa Alfred.
Uyu mukino uzwi nka Deribi (Derby) y’Umutekano, wakinwe tariki ya 08 Ukuboza 2024, ukinirwa muri Petit Sitade Amahoro.
N’ubwo amakipe yombi amaze imyaka yesurana, ni ku nshuro ya mbere yari akiniye muri Petit Sitade.
Imbere y’abafana bari bakubise nta n’iyonka yasigaye, APR HC yegukanye intsinzi irushije Police HC igitego kimwe, nyuma yo kuyitsinda ibitego 26 kuri 25.
Iminota 30 y’igice cya mbere hagati y’amakipe yombi, cyarangiye Police HC iri mbere, kuko zombi zagiye kuruhuka Police HC ifite ibitego 13 kuri 12 bya APR HC.
Nyuma y’iminota icumi y’akaruhuko, umuriro watse muri Petit Sitade, ugukubana gukomeza kuryohera abafana, mu gihe abatoza ku mpande zombi, Bagirishya Anaclet ku ruhande rwa APR HC na Inspector of Police (IP) Cyrille Byiringiro ku ruhande rwa Police HC, imita itari itekanye.
Amakipe yombi yagiye guhurira muri uyu mukino, Police HC iyoboye urutonde rw’agateganyo, mu gihe APR HC yari ku mwanya wa kabiri.
Gutsinda kwa APR HC byahise biyifasha kuyobora urutonde rw’agateganyo rwa shampiyona, irusha Police HC amanota 2.
APR HC ifite amanota 27, igubwa mu ntege na APR HC ifite amanota 25, mu gihe Gicumbi HT iri ku mwanya wa gatatu n’amanota 22.
Nyakabanda HC na Kaminuza y’u Rwanda ishami ry’Uburezi (UR-Rukara) nizo ziri ku myanya ibiri ya nyuma.
Nyakabanda HC iri ku mwanya wa 11 n’amanota 5, mu gihe UR-Rukara iri ku mwanya wa 10 n’amanota 7.
Uko indi mikino yakinywe yagenze:
Ku wa Gatandatu
- Nyakabanda HC 21-56 Police HC
- APR HC 48-33 College Adegi HC
- ES Kigoma HC 48-24 Nyakabanda HC
- College Adegi HC 31-42 Gicumbi HT
- Police HC 48-22 ES Kigoma HC
- Gicumbi HT 30-46 APR HC.
Muri iyi mikino yakinywe ku wa Gatandatu, Amakipe ya; UR-Huye, Gorillas, UB Sports, Musanze HC na UR-Rukara zari zaruhutse.
Ku Cyumweru:
- UR-Rukara HC 28-37 ES Kigoma HC
- College Adegi HC 29-26 Gorillas HC
- UR-Huye HC 24-21 UR-Rukara HC
- ES Kigoma HC 21-24 College Adegi HC
- Golliras HC 20-23 UR-Huye HC
- APR HC 25-25 Police HC.
Muri iyi mikino yakinywe ku Cyumweru, Amakipe ya; Gicumbi HT, UB Sports HC, Musanze HC na Nyakabanda HC zari zaruhutse.
Mu mpera z’Icyumweru gitaha, hazakinwa imikino ihuza ibihugu byo muri Afurika y’i Burasirazuba no hagati izwi nka ECAHF (East and Central Africa Handball Federation).
Iyi mikino mpuzamahanga izabera i Kigali, hagati ya tariki ya 15 kugeza ku ya 22 Ukuboza 2024.
THEUPDATE ifite amakuru ko amwe mu makipe yo mu Rwanda arimo; APR HC, Police HC, Kaminuza ya Kigali, GS Kiziguro n’ayandi.. azitabira iri rushanwa.
Amafoto
