Kuri iki Cyumweru tariki ya 15 Ukuboza 2024, i Kigali mu Rwanda hatangiye gukinirwa imikino y’irushanwa rihuza amakipe ahuriye mu impuzamashyirahamwe y’umukino wa Handball muri Afurika y’i Burasirazuba no hagati ‘East and Central Africa Handball Federation’ (ECAHF).
Iyi mikino yitabiriwe n’amakipe yo mu Bihugu birimo; U Rwanda, u Burundi, Kenya na Sudani y’Epfo.
Ku munsi wa mbere, amakipe yo mu Rwanda, APR HC na Police HC zatangiranye intsinzi.
Police HC yatangiye itsinda ikipe ya Juba City yo muri Sudani y’Epfo, ibitego 63 kuri 11. Igice cya mbere cy’uyu mukino, cyarangiye Police iri imbere n’ibitego 35 kuri 04.
Mu mukino wafunguye iri rushanwa, APR HC na Gicumbi HT zo mu Rwanda, zisuranye karahava.
Uyu mukino wari uryoheye amaso, kuko amakipe yakubanye mu buryo bukomeye.
Uku guhangana kwagaragaye guhera ku itangiriro, kuko igice cya mbere cyarangiye amakipe yombi arushanwa igitego kimwe. APR HC yari ifite ibitego 11, mu gihe Gicumbi HC yari ifite 10.
Mu gice cya kabiri cy’umukino, Umutoza wa APR HC, Bagirishya Anaclet yagerageje kugenda ahinduranya abakinnyi, birangira atsinze Mudaharishema Sylvestre wa Gicumbi HT, ibitego 28 kuri 22.
Imikino irakomeza kuri uyu wa mbere, hakinwa imikino y’umunsi wa kabiri.
Guhera ku isaha ya saa 14:00, Ikipe ya Ecole de Science de Nyamagabe irakina na Kaminuza ya Kigali mu bagore, saa 15:30, UB Sports iracakirana na SOS yo mu Burundi.
Ku isaha ya saa 17:00, Ikipe ya Nairobi HC yo mu gihugu cya Kenya, iresurana na Water Police HC yo muri Uganda, mu gihe saa 18:30, ikipe ya NCPB yo muri Kenya, ihura na Cobra yo muri Sudani y’Epfo.
Iyi mikino yose izakinirwa muri Petit Stade Amahoro, ikazasozwa tariki ya 22 Ukuboza 2024.
Ikipe ya Police HC yo mu Rwanda imaze kwegukana iri rushanwa inshuro eshatu (2015, 2019 na 2021).
Muri izi nshuro eshatu, ebyiri yaritwaye ryakiniwe i Kigali (2015 na 2019) mu gihe mu 2021 yaritwaye ryakiniwe muri Tanzaniya.
Amafoto yaranze imikino y’umunsi wa mbere
- APR HC vs Gicumbi HT
- Police HC vs Juba City
