Abanyeshuri n’abayobozi ba bimwe mu bigo by’amashuri mu Karere ka Gatsibo, baravuga ko kuba ibyo bigo byabo byaratangiye kuvugururwa bizakemura imbogamizi nyinshi bahuraga na zo, kuko inyubako zabyo zari zitakijyanye n’igihe ndetse zikaba zashoboraga gushyira ubuzima bwabo mu kaga.
Iyi ni gahunda Akarere ka Gatsibo katangiye yo gufasha ibigo by’amashuri bya Leta bifite inyubako zishaje kuzivugurura.
Ku ikubitiro ibigo by’amashuri birindwi byo mu mirenge inyuranye mu Karere ka Gatsibo ni byo byahereweho, bikaba bifite inyubako zirenga 70 zirimo kuvugururwa.
Ni igikorwa cyakiriwe neza n’abanyeshuri n’abayobozi b’ibi bigo birimo APEM Ngarama na GS Gatsibo, kuko zimwe mu nyubako zabyo zari zishaje ku buryo zari ziteye impungenge.
Zimwe muri izi nyubako zubatswe mu myaka irenga 40 ishize, zikaba zitari zigifite ubushobozi bwo gukorerwamo igihe kinini.
Biteganyijwe ko kuvugurura izi nyubako bizarangirana n’uyu mwaka w’ingengo y’imari 2024/2025, nyuma hakazakorwa irindi barura ry’izindi nyubako zishaje ku bindi bigo by’amashuri kugira ngo na zo zitangire kuvugurwa. (RBA)
Amafoto
