Ishyirahamwe ry’Umupira w’Amaguru mu Rwanda (Ferwafa), yakuye Ikipe ya Espoir FC mu makipe azakina imikino ya Kamarampaka “Play-Offs”, yemerera amakipe yo mu kiciro cya kabiri kuzamuka mu kiciro cya mbere, nyuma yo gusanga yarakoresheje abakinnyi batabyemerewe ubwo yasozaga imikino yo mu Itsinda rya kabiri yari irimo.
Theupdate ifite amakuru ko ibi byabaye nyuma yo gukurwaho amanota 15 yabonye mu mikino 5 yakinishijwemo Umukinnyi ufite Ubwenegihugu bwo muri DR-Congo, Christian Watanga Milembe.
Espoir FC yakinishije uyu Rutahizamu mu gihe nyamara nta byangobwa iyi Kipe yahawe na Ferwafa biyemerera gukoresha uyu mukinnyi.
Iyi Kipe yo mu Karere ka Rusizi mu Ntara y’i Burengerazuba, ihuye n’ibi twakwita ibyago, nyuma y’uko yari yazamutse iri ku mwanya wa kabiri mu Itsinda rya kabiri.
Nyuma yo guhanwa kwa Espoir FC, Ikipe ya AS Muhanga FC yari ku mwanya wa Gatatu muri iri Tsinda, niyo yahise ihabawa uburenganzira bwo kuzakina imikino ya “Play-Offs”.
Ishyirahamwe rya Ruhago mu Rwanda (Ferwafa), ryatangaje ko iki cyemezo cyafashwe n’akanama gashinzwe Amarushanwa, nyuma y’ikirego cyatanzwe n’Ikipe ya AS Muhanga FC.
Muri iki kirego, AS Muhanga FC yari yandikiye Ferwafa ivuga ko Ikipe ya Espoir FC, yifashishije Umukongomani , Christian Watanga Milembe, mu gihe nyamara nta byangombwa yari afite.
Nyuma yo gusimbura Espoir FC, Ikipe ya AS Muhanga FC, izesurana n’Ikipe ya Vision FC kuri uyu wa Gatatu tariki ya 22 Gicurasi 2024.
Amakuru Theupdate ifite, n’uko Ikipe ya Espoir FC yatangaje ko itazajuririra iki cyemezo.