Guhera tariki ya 04 kugeza ku ya 14 Ukuboza 2024, u Rwanda rurakira Irushanwa mpuzamahanga ry’Umukino wa Cricket rizwi nka ILT20 Africa Continental Cup.
Iri rushanwa rizakinirwa ku Kibuga mpuzamahanga cya Gahanga, rizitabirwa n’Ibihugu bine, birimo; Nigeriya, Uganda, Botswana n’u Rwanda.
Byari biteganyijwe ko n’Igihugu cya Kenya kizaryitabira, ariko ku munota wa nyuma itangaza ko itazaboneka.
ILT20 Africa Continental Cup, izatanga amanota ashingirwaho ku rutonde ngaruka kwezi rw’Impuzamashyirahamwe y’Umukino wa Cricket ku Isi, ICC.
Muri aya makipe ane azaba ari i Kigali, Uganda nicyo gihugu kiyoboye ibindi ku rutonde rwa ICC, kuko iza ku mwanya wa 22.
Nijeriya iri ku mwanya wa 36, Botswana ku mwanya wa 50 mu gihe u Rwanda aricyo gihugu kiri ku mwanya wa kure, uwa 63.
Kuri uyu wa Gatatu tariki ya 04 Ukuboza 2024, Uganda na Botswana barafungura iri rushanwa ku isaha ya saa tatu n’iminota cumi n’itanu (09:15), mu gihe saa Saba n’Iminota mirongo itanu (13:50), u Rwanda ruri mu rugo rwisobanura na Nijeriya.
Ibi bihugu bizakina mu buryo buri kipe ihura n’indi. Bazakina imikino 19 yose hamwe muri iyi minsi 10, kugeza habinetse iyegukana Igikombe.
Uganda niyo yegukanye irushanwa rya ILT20 Africa Continental Cup ry’Umwaka ushize, itsinze Kenya ku mukino wa nyuma wakiniwe i Nairobi kuri Gymkhana Oval.
Abakinnyi Uganda izakoresha: Riazat Ali Shah (c), Pascal Murungi, Frank Nsubuga, Henry Ssenyondo, Dinesh Nakrani, Cosmas Kyewuta, Alpesh Ramjani, Robinson Obuya, Raghav Dhawan, Fred Achelam, Shrideep Mangela, Joseph Baguma, Simon Ssesazi, Juma Miyaji.
