Ikipe ya Indatwa Hampshire yegukanye Igikombe cy’Irushanwa rya Dafabet RCA T20 Women’s Tournament 2023 nyuma yo gutsinda iya Sorwathe ikuye mu kibuga abakinnyi bayo bose (All Out).
Uyu mukino wakinwe kuri iki Cyumweru ku Kibuga mpuzamahanga cya Cricket giherereye i Gahanga mu Karere ka Kicukiro mu Mujyi wa Kigali.
Muri uyu mukino, ikipe ya Sorwathe niyo yatangiye ishyiraho amanota (Batting), ishyiraho amanota 70 muri Ovars 16 n’Udupira 4, mu gihe ikipe ya Indatwa Hampshire yakuye mu kibuga abakinnyi bayo bose (All Out).
Igice cya kabiri cy’uyu mukino, ntabwo cyagoye Indatwa Hampshire, kuko muri Overs 12 n’Udupira 2 yari imaze gutsinda amanota 73 yari yatsizwe na Sorwathe Cricket Club, mu abakinnyi bayo babiri aribo bari bakuwe mu kibuga (2 Wickets)
Iri rushanwa ryateguwe n’Ishyirahamwe ry’umukino wa Cricket mu Rwanda (RCA) ku bufatanye na Dafabet, ryitabiriwe n’amakipe 5 akina ikiciro cya mbere cya Shampiyona y’abagore, agizwe na; Sorwathe Cricket Club, Gahanga Queens Cricket Club, Charity Cricket Club, White Clouds Cricket Club na Indatwa Hampshire Cricket Club.
Nyuma yo kwegukana iri rushanwa, umutoza w’ikipe ya Indatwa Hampshire, Hirwa Eric agarina n’Itangazamakuru yagize ati:”Kwegukana iri rushanwa tudatsinzwe umukino n’umwe tubikesha amasomo twakuye mu marushanwa twitabiriye mu bihe byashize, dufata umwanzuro wo gukina dukorera hamwe nk’ikipe aho gukina umuntu ku giti cye”.
Umuyobozi ushinzwe ibikorwa mu Ishyirahamwe rya Cricket mu Rwanda, Emmanuel Byiringiro, agaruka kuri iri rushanwa yavuze ko nk’Ishyirahamwe banejejwe ni umusaruro ryatanze.
Ati:”Ryafashije abakinnyi b’ikipe y’Igihugu baryitabiriye kuzamura urwego, mbere yo kwerekeza mu mwiherero utegura Irushanwa ryo kwibuka ku nshuro ya 29 Jenoside yakorewe Abatutsi”.
Iri rushanwa ribura iminsi itatu (3) ngo ritangire, rizitabirwa n’amakipe y’Ibihugu arimo; Botswana, Nijeriya, Kenya, Uganda n’u Rwanda.
Uko amakipe yahembwe
Igikombe:
- INDATWA HAMPSHIRE Cricket Club yegukanye igikombe ihabwa na sheke ya 1,000,000 Frw
- Sorwathe Cricket Club yabaye iya kabiri, ihabwa sheke ya 500,000 Frw
- Uwakubise neza Imipira: GISELE Ishimwe ukinira Indatwa Hampshire, ahembwa sheke y’i 100,000 Frw
- Uwateye Udupira neza: Ishimwe HENRIETTE ukinira Indatwa Hampshire, ahembwa sheke y’i 100,000 Frw
- Uwatsinze amanota 6 kurusha abandi: HENRIETTE Ishimwe, ahembwa, ahambwa sheke 70,000 Frw
- Uwakoze amanota menshi yiruka mu Kibuga: SIFA Ingabire ukinira Indwatwa Hampshire, ahembwa sheke 70,000 Frw
- Umukinnyi wahize abandi: HENRIETTE Ishimwe, ahembwa sheke 200,000 Frw
Amafoto
