Kuri uyu wa Kane tariki ya 07 Ugushyingo 2024, Ikipe y’Ingabo z’u Rwanda, APR FC yatangaje ko Colonel (Rtd) Karasira Richard atakiri umuyobozi wayo.
Uyu musirikare uri mu kirihuko cy’izabukuru, yari amaze Umwaka n’Amezi 5 ayobora APR FC, umwanya yagiyeho asimbuye General Mubarak Muganga.
Karasira yagiye kuri uyu mwanya muri Kamena y’i 2023, nyuma y’uko Gen. Muganga wayoboraga iyi kipe agizwe Umugaba mukuru w’Ingabo z’u Rwanda, ibi byatumye inshingano ziba nyinshi, umwanya wo kwita kuri APR FC uragabanuka.
Gusimbuzwa kwa Karasira, kwatangajwe ko kwashingiye ku mpinduka z’imbere muri iyi kipe, gusa hari n’abavuga ko kwaba gufitanye isano n’umusaruro nkene iyi kipe ifite.
Imwe muri nyirabayazana, ni mpaga iyi kipe yatewe nyuma yo gukoresha abakinnyi 7 b’Abanyamahanga mu mukino wa shampiyona w’umunsi wa 8 yanganyijemo na Gorilla FC, mu gihe nyamara hemewe gukoresha Abanyamahanga 6.
Col (Rtd) yatandukanye na APR FC nyuma y’uko abandi barimo; Team Manager Eric Ntazinda na Georgine Kalisa wari ushinzwe ibijyanye n’umutungo nabo beretswe umuryango muri iki Cyumweru.
Amakuru THEUPDATE ifite, n’uko Col (Rtd) Karasira yasimbujwe Brig. Gen. Deo RUSANGANWA.