Carlo Ancelotti, Umutoza mpuzamahanga w’Umutaliyani, yaraye asezeye ku bafana b’Ikipe ya Real Madrid yo mu gihugu cya Esipanye, yari amazeho hafi imyaka ine.
Uyu mugabo w’imyaka 65 y’amavuko, yabasezeyo nyuma y’umukino wa El Clásico yaraye atsinzwemo na FC Barcelona.
Uyu mukino wari uw’umunsi wa 35 wa Shampiyona, FC Barcelona yari mu rugo, yawutsinze ku ntsinzi y’ibitego 4-3.
Biteganyijwe ko ntagihindutse, nyuma yo gutsinda Real Madrid, FC Barcelona izegukana igikombe cya shampiyona ntakabuze, kuko kuri ubu, iyoboye urutonde n’amanota 82, irusha Real Madrid iyigwa mu ntege amanota 7 kuko ifite 75. Ni mu gihe hasigaye imikino 3 gusa.
Nyuma yo gutandukana na Real Madrid, Carlo Ancelotti ntagihindutse arahita yerekeza mu Ikipe y’Igihugu ya Brazil imukeneye bidasubirwaho, mu gihe Real Madrid ihita imusimbuza Xabi Alonso watozaga Ikipe ya Bayer Leverkusen ntagihindutse.
Gutsinda umukino kwa FC Barcelona, byayigaruriye ikizere nyuma gukurwamo na Inter Milan muri ½ cya UEFA Champions League.
Byashimangiye kandi ko bamaze kwigarurira Real Madrid, kuko uretse kuba bayitsinze inshuro ebyiri muri Shampiyona, banayitwariyeho igikombe cy’Umwami n’ikiruta ibindi muri Esipanye.
Bivuze kandi ko ntagihindutse, Real Madrid yanditse amateka mabi, yo kuba bigiye kuba ubwa mbere mu myaka 15, isoza Umwaka w’imikino nta gikombe itwaye. Ibihe nk’ibi, byaherukaga mu Mwaka w’imikino w’i 2009-10.
Carlo Ancelotti azibukirwa ko muri iyi myaka hafi ine yari amaze muri Real Madrid, akihagera yahise yegukana igikombe cya Shampiyona, icy’Umwami, ikiruta ibindi muri Esipanye, icya UEFA Champions League, igikombe cya UEFA kiruta ibindi ndetse n’Igikombe cy’Isi cy’ama-clubs.
Mu mwaka ushize kandi, yegukanye igikombe cya UEFA Champions League, atsinze ikipe ya Borussia Dortmund ku mukino wa nyuma.
Inshuro ebyiri yatoje Real Madrid mu bihe bitandukanye, Carlo Ancelotti yatwaranye nayo, ibikombe 15 byose hamwe.