Nyuma yo gusezerera mu nshingano Col (Rtd) Karasira Richard ku wa kane w’iki Cyumweru ku buyobozi bw’ikipe y’Ingabo z’u Rwanda, APR FC, kuri ubu yabonye umusimbura.
Uyu wahawe izi nshingano, ni Brigadier General Deo Rusanganwa. Col (Rtd) Karasira Richard yakuwe kuri uyu mwanya awumazeho Umwaka n’Amezi atanu.
Ukwerekwa umuryango kwa Col (Rtd) Karasira Richard kwaje gukurikira umusaruro mubi iyi kipe yari ifite, bikongeraho n’ibibazo by’imiyoborere bitagiye bivugwaho rumwe.
Byaje guhuhurwa na mpaga yatewe APR FC mu mukino yatangije mu kibuga abakinnyi 7 b’Abanyamahanga ihura na Gorilla FC, mu gihe amategeko ateganya 6.
Mbere y’uko atangazwa ku mugaragaro nk’umuyobozi mushya wa APR FC, Brigadier General Deo Rusanganwa yahuye n’abakinnyi b’iyi kipe ku wa Gatanu w’iki Cyumweru, nyuma y’umukino wa Shampiyona y’ikiciro cya mbere batsinzemo Vision FC ibitego 2-0.
Brigadier General Deo Rusanganwa yabwiye abakinnyi ko n’ubwo basezerewe mu mikino ya CAF Champions League bakanatangira nabi Shampiyona, ubuyobozi bw’Ingabo z’Igihugu buzakomeza kubaba hafi, bakagaruka mu murongo wo guhatanira igikombe cya Shampiyona n’icy’Amahoro.
Ati:“Ntarirarenga. Mukosore aho bitageze neza, kuko ntimuri abakinnyi babi. Ubuyobozi kuva hejuru burabashyigikiye. Mutsinda nicyo gikenewe, musubize APR FC aho yahoze”.
Uretse kuba ari Umusirikare wo ku rwego rwa Brigadier General, Deo Rusanganwa yabaye mu buyobozi bw’Ikipe ya Marine FC.
Marine FC nayo n’Ikipe y’Ingabo z’u Rwanda zirwanira mu Mazi.
Kuri iki Cyumweru, APR FC ntabwo yakiriye neza umuyobozi wayo mushya, kuko yanganyije 0-0 na Rutsiro FC mu mukino wa Shampiyona wakiniwe kuri Sitade yitiriwe Pele i Nyamirambo.