Impera z’Icyumweru gishize, zaranzwe n’imikino ya Phase ya kabiri ya Shampiyona ya Volleyball ikinirwa ku Mucanga.
Iyi mikino yakiniwe mu Karere ka Gasabo kuri King Fisher Resort-Rwesero, yakinwe hagati ya tariki ya 03-05 Mutarama 2025.
Bitandukanye na Phase ya Mbere yakinwe mu Kwezi k’Ugushyingo (11) mu Mwaka ushize, kuri iyi nshuro, Ikipe ya Ntagengwa Olivier ukinana na Akumuntu Kavaro Patrick, yakozwe mu jisho, mu gihe mu kiciro cy’abagore, iya Munezero Valentine na Mukandayisenga Benitha ikomeje kuba izicwa na nde.
Amakipe 22 y’abagore n’abagabo, yaresuranye mu gihe cy’iminsi itatu ikurikiranye, ahanganiye kwegukana amanota atangwa n’Impuzamashyirahamwe ya Volleyball ku Isi (FIVB), aya manota kandi yaherekejwe nImidari n’amafaranga Ibihumbi 300 ku ikipe ya mbere n’Ibihumbo 100 ku ikipe ya gatatu.
Mu bagabo, Ikipe ya Paul Akan ukomoka muri Ghana ukina afatanyije na Koita Jahara wo muri Gambia, yegukanye iyi Phase ikoze mu jisho iya Ntagengwa Olivier (Rw) ufatanya na Akumuntu Kavaro Patrick (Rw).
Bayitsinze amaseti 2-0. Iseti ya mbere yarangiye ari ibitego 21 kuri 15, mu gihe iya kabiri yarangiye bigoranye, ku manota 21 kuri 19.
Umwanya wa gatatu wegukanywe n’ikipe ya Mandela Nzirimo ufatanya na Revis Niyikiza, batsinze iya David Neeke (Tz) ufatanya na Jean Paul Muyisenge (Rw) amaseti 2-1 (17-21, 21-17, 15-08).
Mu cyiciro cy’abagore, Ikipe ya Munezero Valentine (Rw) na Mukandayisenga Benitha (Rw) yatsinze ku mukino wa nyuma iya Musabyimana Penelope (Rw) na Amito Sharon (Ug) amaseti 2-0 (21-16, 21-11).
Umwanya wa gatatu wegukanywe n’ikipe ya Yankurije Francoise (Rw) ufatanya na Nirere Aliane (Rw), batsinze iya Ndagijimana Iris (Rw) ufatanya na Sande Meldinah (Ke) amaseti 2-0 (21-16, 21-08).
Phase ya gatatu ari nayo ya nyuma isoza Shampiyona ya Beach Volleyball y’i 2024-25, gateganyijwe gukinwa mu Kwezi kwa Kamena (6), ikazakinirwa mu Karere ka Rubavu mu Ntara y’Uburengerazuba bw’u Rwanda.
Amafoto
