Mu mpera z’Icyumweru twaraye dushoje, hakinwe Umunsi wa mbere wa Shampiyona ya Volleyball ikinirwa ku Mucanga (Beach Volleyball).
Uyu munsi wakiniwe ahazwi nka King Fisher ku Rwesero mu Karere ka Gasabo ku Nkengero z’Ikiyaga cya Muhazi hagati ya tariki ya 01 n’iya 03 Ugushyingo 2024.
Witabiriwe n’abakinnyi batandukanye mu kiciro cy’abagore n’abagabo, bakina Shampiyona y’ikiciro cya mbere, hafi ya bose bakina Volleyball isanzwe (Indoor Volleyball).
Mu kiciro cy’abagore, Ikipe ya Munezero Valentine na Mukandayisenga Benitha bakinira APR WVC niyo yahize izindi, nyuma yo gutsinda ku mukino wa nyuma, iyari igizwe na Francoise Yankurije na Ariane Nirere bakinira Police WVC, amaseeti 2-0 (21-17 na 21-14).
Umwanya wa gatatu wegukanywe n’abakinnyi bakinira Ikipe y’Ikigo cy’Igihugu cy’Imisoro n’Amahoro (Rwanda Revenue Authority), RRA WVC, Elizabeth Ukpabi na Irene Mpeti, batsinze iya Sharon Amito ukinana na Gaoleseletse Lizzy Gasekgonwe bombi ba APR WVC, amaseti 2-1.
Mu mikino ya 1/2, Ikipe ya Munezero na Mukandayisenga yakuyemo iya Elizabeth Ukpabi na Irene Mpeti, mu gihe iya Francoise Yankurije na Ariane Nirere yari yasezereye iya Sharon Amito na Gaoleseletse Lizzy Gasekgonwe.
Mu kiciro cy’abagabo, uyu munsi wa mbere wa Shampiyona, wegukanywe n’Ikipe ya Ntagengwa Olivier ukinana na Gatsinzi Venuste, batsinze ku mukino wa nyuma iya Paul Akan na Prince Kanamugire bombi ba APR VC, amaseti 2-0 (21-18 na 21-17).
Umwanya wa gatatu wegukanywe n’Ikipe ya Nzirimo Mandela ukinana na Levis Niyikiza, batsinze iya Patrick Akumuntu uzwi nka Kavaro na Gloire Niyonkuru, amaseti 2-1 (21-18, 11-21 na 15-11).
Iyi mikino yari yahuruje abatari bacye mu bakunzi b’umukino wa Volleyball, yaherukaga gukinwa mu Mwaka ushize.
Nyuma y’umunsi wa mbere (Phase), umunsi wa kabiri uteganyijwe hagati ya tariki ya 3 n’iya 5 z’Ukwezi kwa Mutarama (1) mu 2025, mu gihe umunsi wa gatatu ari nawo wa nyuma uzakinwa hagati ya tariki ya 16 na 18 Kamena 2025.
Ntagihindutse, iyi minsi ishobora kuzakinirwa mu Turere twa Karongi na Rubavu mu Ntara y’i Burengerazuba.
Volleyball ikinirwa ku Mucanga n’umukino umaze kumenyerwa mu Rwanda, cyane ko rwanakiriye imikino yo ku rwego rw’isi (World Tour) mu bihe bitandukanye. Iyi mikino yakiniwe mu Karere ka Rubavu.
Iyi Shampiyona yateguwe n’Ishyirahamwe Nyarwanda ry’Umukino wa Volleyball ku bufatanye na Komite Olempike y’u Rwanda.
Amafoto
